ఈ కుక్క ఆస్తి రూ.3500 కోట్లు!

సంపన్నుల ఇళ్లలో దర్జాగా బతికే కుక్కలను చూస్తుంటాం. ఖరీదైన వాటి గురించీ వింటుంటాం. వాటన్నింటికీ మించిన భోగాలను అనుభవిస్తున్న శునకం గురించి తెలిస్తే ఆశ్చర్యమేస్తుంది. అదే దాదాపు రూ.3500 కోట్లకు అధిపతి అయిన గుంథర్‌-6. ప్రపంచంలోనే సంపన్న శునకమైన గుంథర్‌-6 నిద్రలేచింది మొదలు- దానిచుట్టూ పరిచారికలు చేరి బాగోగులు చూసుకుంటారు. పూటకో వెరైటీ చేసి పెట్టడానికి ఓ షెఫ్‌ ఉంటాడు. ఆటలాడించడానికీ, మార్నింగ్‌ వాక్‌కీ, హోటళ్లకీ తీసుకెళ్లడానికీ- దానికున్న ప్రత్యేక విమానంలోనూ, క్రూయిజ్‌లోనూ తిప్పడానికీ ప్రత్యేకంగా సిబ్బందీ ఉన్నారు. ఈ జర్మన్‌ షెపర్డ్‌ జాతి కుక్క మీద నెట్‌ఫ్లిక్స్‌లో వచ్చిన ‘గుంథర్స్‌ మిలియన్‌’తో ఇది వరల్డ్‌ ఫేమస్‌ అయిపోయింది. ఇంతకీ ఆ కుక్కకి అంత ఆస్తి ఎలా వచ్చిందంటే... జర్మనీకి చెందిన ఓ రాణి చనిపోతూ గుంథర్‌-3కి తన ఆస్తిని రాసిచ్చి- ఇటలీకి చెందిన వ్యాపారవేత్త మౌరిజియో మియాన్‌కి దాని బాధ్యతల్ని అప్పగించింది. దాదాపు ముప్ఫైగేళ్లుగా మియాన్‌ గుంథర్‌ వారసులను సంరక్షిస్తూ వస్తున్నాడు. ఒకప్పుడు పాప్‌ సింగర్‌ మడోన్నా నివాసమున్న భవనాన్ని సొంతం చేసుకుని తాజాగా వార్తల్లోకి వచ్చిన గుంథర్‌-6 ప్రస్తుతం తన ముత్తాత ఆస్తిని అనుభవిస్తోంది.