అలంకరణకు అద్దాల బొమ్మలు

ఇంట్లోని డ్రెస్సింగ్‌ టేబుల్‌కీ, వార్డ్‌రోబ్‌కీ, వాష్‌బేసిన్‌ దగ్గరా అద్దాలను అమర్చడం అనేది ఎప్పటినుంచో ఉన్నదే. అయితే ఇప్పుడా అద్దాలు కూడా అందమైన చిత్రపటాలుగా మారిపోయి గృహాలంకరణలో భాగమయ్యాయి. ‘అలంకరణకోసం అద్దాలా... చేయి తగిలినా, పిల్లలు ఆడుకునే బంతి పడినా ముక్కలైపోతాయిగా... పైగా వాటన్నింటినీ ఏరడమూ కష్టమే కదా’ అంటారేమో... ఆ భయం లేకుండానే వీటిని ఎంచుకోవచ్చు. ఎందుకంటే... ఈ అద్దాల బొమ్మలన్నీ నచ్చినచోట అతికించుకునేలా అక్రిలిక్‌ స్టిక్కర్ల రూపంలో ఉంటాయి. కోరుకున్న బొమ్మల డిజైన్లతో వచ్చే ఈ స్టిక్కర్లను గదుల్లో అక్కడక్కడా అతికించడం వల్ల... లైటు వేసినప్పుడు ఆ వెలుతురు అద్దాలపైన ప్రతిబింబించి ఇల్లూ మెరిసిపోతుంది. పైగా సందర్భాన్ని బట్టి వాటిని తీసేసి మరోచోటా అతికించు కోవచ్చు కూడా.