బొమ్మల్ని అందంగా సర్దేద్దామా!

పిల్లలున్న ఇంట్లో ఎన్ని రకాల బొమ్మలుంటాయో చెప్పనక్కర్లేదు. ఏ కొత్త బొమ్మ కొన్నా దాంతో కొన్నిరోజులే ఆడతారు. మళ్లీ దానిస్థానంలో ఇంకో బొమ్మ రావాల్సిందే. అందుకే మరి ఇల్లంతా బొమ్మలతోనే నిండిపోతుంది. ఆ సమస్య లేకుండా వాటన్నింటినీ పైన ఎక్కడో పెట్టేద్దామంటే... మళ్లీ పిల్లలు ఎప్పుడు, ఏ బొమ్మ కావాలంటారో తెలియదు. అందుకే దీనికి పరిష్కారం చూపిస్తూ బొమ్మల్నీ అందంగా సర్దుకునేలా ‘ట్రాన్స్‌పరెంట్‌ డాల్‌ స్టోరేజ్‌ బకెట్‌, టాయ్‌ స్టోరేజ్‌ ఆర్గనైజర్‌’ పేర్లతో ఎన్నెన్నో బాక్సులు వచ్చాయి. పారదర్శకంగా కనిపించే వీటిల్లో బొమ్మలన్నింటినీ పెట్టేసి గదిలో ఓ మూలన ఉంచామంటే- చూడ్డానికీ ఎంతో అందంగా ఉంటుంది, పైగా అవసరమైనప్పుడు బొమ్మల్ని తీసి ఆడుకోవచ్చు. కోరుకున్న సైజుల్లో దొరుకుతున్నాయివి. మనకు కావాల్సింది కొనుక్కుని వాడుకోవచ్చు!