ఈ ట్రేలో ఏదీ జారిపడదు!

ఇంటికి వచ్చినవారికి కాఫీ టీలూ కూల్‌డ్రింకులూ ట్రేలో పెట్టుకుని అందిస్తుంటాం. ఒక్కోసారి అనుకోకుండా చేయి తగిలినప్పుడు ట్రేలో ఉంచిన గిన్నెలూ గ్లాసులూ పడిపోయి, అందులోని పదార్థాలు ఒలికిపోతుంటాయి కదా. కానీ ఇక్కడున్న ట్రేతో... ఆ ఇబ్బందే ఉండదు. ఎందుకంటే ఇది నాన్‌ స్లిప్‌ సర్వింగ్‌ ట్రే మరి. ప్లాస్టిక్‌, మెటల్‌తో వచ్చే ఈ ట్రే పైనా కిందా కూడా నాన్‌స్లిప్‌ సిలికాన్‌ గ్రిడ్‌ లాంటిది ఉంటుంది. దీనివల్ల ట్రేలో ఉంచిన పాత్రలేవీ పక్కకు జరగవన్నమాట. ట్రేని కాస్త వంచినా గిన్నెల్లోని పదార్థాలు పడిపోవు. రకరకాల సైజుల్లో వేరువేరు ఆకారాల్లో అందుబాటులో ఉన్నాయి ఇవి. మామూలు ట్రేలకు బదులు వీటిని కొన్నామంటే ఎంతో ఉపయోగంగా ఉంటుందంటే నమ్మండి!