ఇంటి మందిరానికి దీపాల తోరణం!

పూజగది ప్రత్యేక శోభతో కనిపించాలనుకునే గృహిణులందరూ- పీఠం మీద ఉంచే దేవుని పటం దగ్గర్నుంచి పూజామందిరపు అలంకరణల వరకూ అన్నింటిపైనా దృష్టిపెడతారు. వాళ్ల అభిరుచిని దృష్టిలో పెట్టుకునే మార్కెట్లోనూ పూజాసామగ్రి కొత్తకొత్తగా వస్తోంది. అందులో భాగంగానే ‘డ్యూయల్‌ స్టాండ్‌ మల్టిపుల్‌ విక్స్‌ ల్యాంప్‌’ పేరుతో రకరకాల ఇత్తడి దీపాల తోరణాలు వచ్చాయి. అడుగు నుంచి ఆరు అడుగుల ఎత్తు వరకూ ఉండే వీటిని మనకు కావాల్సిన సైజుల్లో కస్టమైజ్‌ కూడా చేయించుకోవచ్చు. పూజగదిలో రెండువైపులా ఉంచే దీపపు కుందులకు బదులుగా అటూ, ఇటూ, పైనా తోరణంలా ఉండే ఈ ఒక్క దీపపు స్టాండ్‌ని ఎంచుకుని చూడండి. పూజగది అంతా ఆధ్యాత్మిక శోభను నింపుతూనే... పూజలూ, వ్రతాలప్పుడు వచ్చినవారిని మరింతగా ఆకట్టుకుంటుంది!