రోలుకీ మూత పెట్టేద్దాం!

పొడులు పట్టుకోవడానికి ఎన్ని రకాల మిక్సీలు వచ్చినా... అప్పటికప్పుడు పోపులోకి వెల్లుల్లో, టీలోకి అల్లమో దంచుకోవడానికి మాత్రం చాలావరకూ అందరి ఇళ్లల్లో చిన్న రోలు తప్పనిసరిగా ఉంటుంది. అన్ని వస్తువుల్లో సౌకర్యాలు వస్తుంటే రోలులో మాత్రం ఎందుకు రాకూడదను కున్నారేమో- మూతతో ఉన్న రోలును తీసుకొచ్చేశారు. మామూలుగా రోట్లో ఏమైనా వేసి దంచుతుంటే అవి బయటకి చిందిపోతుంటాయి. దాని వల్ల మళ్లీ రోలు చుట్టూ శుభ్రం చేయాల్సి వస్తుంది. అదే మూత పెట్టేసి దంచుకున్నామంటే, ఆ ఇబ్బందే ఉండదు. స్టీలూ, మార్బులూ, చెక్కతో వచ్చే రకరకాల రోళ్లూ ఇప్పుడు మూతతోనే వస్తున్నాయి. అంతేకాదు, కొన్నేమో పనయ్యాక రోకలిని మూతపైనే పెట్టేలానూ ఉన్నాయి. కిచెన్‌ వస్తువుల్లో వచ్చే మార్పు- ఇంత చిన్నదైనా గృహిణుల్ని ఆకట్టుకోకుండా ఉంటుందా!