నీళ్లూ... నోరూరించేలా!

వేసవిలో  బయటకు వెళ్లామంటే మనతో ఏ వస్తువు ఉన్నా లేకపోయినా వాటర్‌ బాటిల్‌ని కచ్చితంగా వెంట తీసుకెళుతుంటాం. అందుకే కొందరు ఆ బాటిల్స్‌లోనే వెరైటీనీ కోరుకుంటూ మార్కెట్లో వచ్చే కొత్తరకాల్ని ట్రై చేస్తుంటారు. అలాంటి వారికోసమే ఈమధ్య ఫ్లేవర్‌ పాడ్స్‌ వాటర్‌ బాటిళ్లు వచ్చాయి. బాటిల్‌తో పాటూ కమ్మని వాసనలు వెదజల్లే వాటర్‌ పాడ్స్‌ జతగా వస్తాయి. నిమ్మ, నారింజ, మామిడి, బొప్పాయి... ఇలా రకరకాల పండ్ల వాసనలతో ఉండే వీటిని బాటిల్‌ మూత దగ్గర పెట్టుకోవచ్చు. ఆహారం- తినడానికి ముందే వాసనలతో ఘుమఘుమలాడినట్టు... బాటిల్‌లోని నీళ్లూ- పండ్ల వాసనల్ని వెదజల్లుతాయి. కావాలంటే ఈ ఫ్లేవర్‌ పాడ్స్‌ విడిగానూ దొరుకుతున్నాయి. సమయానికి నీళ్లు తాగడాన్నీ వాసనతోనే గుర్తుచేసేలా ఉండే ఈ రుచుల పాడ్స్‌ భలేగా ఉన్నాయి కదూ!