పిల్లల ఎత్తు స్మార్ట్‌గా కొలిచేద్దాం!

పిల్లలు వయసుకు తగ్గట్టు పెరుగుతున్నారా... వాళ్ల ఎత్తూబరువులు సరిగ్గానే ఉన్నాయా... అంటూ అమ్మానాన్నలకు ఎన్నో సందేహాలు. అందుకే నెలల వయసు నుంచి ఎప్పటికప్పుడు చిన్నారుల ఎత్తూబరువుల్ని చెక్‌ చేస్తూనే ఉంటారు. కానీ పిల్లల్ని ఒకచోట నిల్చోబెట్టి ఆ కొలతలు చూడటమూ, వాటన్నింటినీ గుర్తుపెట్టుకోవడమూ కాస్త కష్టమే. అలా కాకుండా ఆడుతూపాడుతూనే వాళ్ల ఎత్తూ బరువుల్ని కొలవాలంటే... ఇక్కడున్న ‘కీకో లేజర్‌ హైట్‌ మెజరర్‌ అండ్‌ స్మార్ట్‌ స్కేల్‌’ని ప్రయత్నించొచ్చు.

ఈ లేజర్‌ హైట్‌ మెజరర్‌ని తలపైన ఉంచగానే తెరమీద ఎత్తు కనిపించేస్తుంది. అలాగే స్మార్ట్‌ స్కేల్‌ మీద నిల్చోబెట్టగానే బరువుతోపాటూ చిన్నారుల బాడీ మాస్‌ ఇండెక్స్‌... బుజ్జాయిల శరీరంలోని కొవ్వు, నీటి శాతాలు... ఇంకా ఎముకల, కండరాల మాస్‌ వివరాలన్నీ చూపిస్తుందది. పైగా ఈ సమాచారమంతటినీ ఆప్‌ ద్వారా ఫోన్లో రికార్డు చేసుకోవచ్చు. పిల్లల బీఎంఐని సులువుగా చూపే ఈ లేజర్‌ స్కేల్‌ ఎంతో ఉపయోగం కదూ!