రంగులు మార్చే ఫ్రేములివి!

సాధారణంగా ఫొటోఫ్రేమ్‌, వాల్‌ పెయింటింగ్‌ ఏవైనా రోజంతా ఒకేలా కనిపిస్తాయి కదా. కానీ ఇక్కడున్న ‘లైటెడ్‌ పెయింటింగ్‌ లెడ్‌ వాల్‌ ఆర్ట్‌’ను చూశారా... ఇది ఒక్కో పూట ఒక్కోలా దర్శనమిస్తుంది. నిజమండీ బాబూ... బయట వాతావరణంలోని సహజమైన ఎండా, పగలూ, రాత్రీ, ఇంట్లోని లైట్ల వెలుగులూ తదితరాల ఆధారంగా తెల్లటి చిత్రం కాస్తా రంగులతో వెలుగుతుంది. వెలుతురులోని తేడాల్ని బట్టి ఆ ఫొటోఫ్రేములోనూ రంగులూ మారుతూ ఉంటాయి. యూఎస్‌బీ కేబుల్‌తో కనెక్ట్‌ చేసుకునే వీలున్న ఈ లెడ్‌ పెయింటింగ్‌ల్ని లైట్‌ సెన్సర్లను బట్టి రంగులు కనిపించేలా తయారుచేశారు. ప్రకృతి అందాల్ని ఇష్టపడేవారు ఏదో ఒక ఫొటోఫ్రేమ్‌కు బదులు వీటిని ఎంచుకోవచ్చు. కళ్లముందు బొమ్మలోని కాంతులూ మారిపోతూ నిజమైన ప్రకృతిలా కనువిందుచేస్తాయి.