ఇక... చెవులు చిల్లులుపడవు!

పండగా పబ్బమనే కాదు- నలుగురు కలిసే కార్యక్రమం ఏదైనా సరే మనదగ్గర భారీ సౌండ్‌తో పాటలు మోతమోగి పోవాల్సిందే. వీటన్నింటితో చెవులు చిల్లులుపడతాయని మనకు తెలుసు. ‘చెవులు చిల్లులుపడటమంటే లోపలి కణాలు దెబ్బతినడమే’ అనుకుంటూ ఉన్నారు శాస్త్రవేత్తలు ఇంతకాలం. ‘కణాలు దెబ్బతింటాయి సరే, ఏ కణాలు?’ అన్న ప్రశ్న వచ్చింది తాజాగా అమెరికాలోని పిట్స్‌బర్గ్‌ వర్సిటీ శాస్త్రవేత్తలకి. అందుకోసమే ప్రయోగశాలల్లోని కొన్ని ఎలుకలకి వంద డెసిబెల్స్‌ శబ్దాన్ని వినిపించారు. వంద డెసిబెల్స్‌ అంటే... సైలెన్సర్‌ చెడిపోయిన ఓ మోటారుబైకు సౌండుకి సమానం! దాన్ని రెండుగంటలపాటు విన్న ఎలుకలు వినికిడిశక్తిని కోల్పోయాయట. వాటి చెవి భాగాల్ని పరిశీలిస్తే వినికిడి సామర్థ్యంలో కీలకపాత్ర పోషించే మృదులాస్థి(కాక్లియా) చుట్టూ ‘జింక్‌’ మూలకాలు తేలుతుండటాన్ని చూశారు. చెవిలోని ప్రొటీన్‌ కణాలు దెబ్బతిని వాటి నుంచి ఈ జింక్‌ విడిపోవడమే ఇందుక్కారణమని తేల్చారు. దాంతో చెవి కణాల నుంచి జింక్‌ అలా విడిపోకుండా అడ్డుకునే ప్రత్యేక రసాయనాల్ని తయారుచేస్తే- చెవులు చిల్లులుపడకుండా కాపాడొచ్చని భావించారు. వాటినో మందుగా తయారుచేసి ఎలుకలపైన విజయవంతంగా ప్రయోగించారు. త్వరలో వాటిని మనుషుల కోసమూ చుక్కల మందుగా తెస్తారట. వాటిని వేసుకుని- డీజే కార్యక్రమానికి వెళ్ళినా ఏమీ కాదంటున్నారు!