ప్రకృతి అందాలతో ఏకాగ్రత

ప్రకృతి మధ్య నడిస్తే మానసిక ప్రశాంతత వస్తుందనీ, ఆరోగ్యానికి మేలనీ చెబుతుంటారు. ఆ రెండే కాదు- మేధోశక్తికి ఆధారభూతమైన ఏకాగ్రతా పెరుగుతుందంటున్నారు ఇప్పుడు పరిశోధకులు. అమెరికాలోని ఉటా విశ్వవిద్యాలయం శాస్త్రవేత్తలు దీనిపైన సరికొత్త పరిశోధనొకటి చేశారు. ఓ వందమంది విద్యార్థులకి మెదడు పనితీరుని లైవ్‌గా పరీక్షించే ఎలక్ట్రో ఎన్సెఫలోగ్రఫీ(ఈఈజీ) టోపీలని అందించారు. వాళ్ళని రెండు జట్లుగా విభజించి ఓ జట్టుని ప్రకృతి అందాల నడుమ నడవమన్నారు. మరో జట్టుని- నగర రోడ్ల మధ్య నడవాలని సూచించారు. విద్యార్థులలా వేగంగా నడుస్తుండగా పరిశోధకులు- వాళ్ళ మెదడులో జరుగుతున్న మార్పుల్ని ప్రత్యక్షంగా విశ్లేషించారు! నగర రోడ్లపైన నడిచేవారికన్నా- ప్రకృతిమధ్య నడచిన వారిలో ఏకాగ్రతకి కారణమయ్యే ‘ఫ్రంటల్‌ కార్టెక్స్‌’ వందరెట్లు చురుగ్గా పనిచేస్తోందని తేల్చారు. కాబట్టి- పరీక్షలకి సిద్ధమయ్యేవారు రోజూ ఏదోరకంగా ప్రకృతితో మమేకమైతే మంచిదని వారు చెబుతున్నారు.