స్నేహాలతోనే... పని సామర్థ్యం!

టీ పాయింట్‌ దగ్గర ముచ్చట్లు, క్యాంటీన్‌లో కాసేపు బాతాఖానీ... ఇవన్నీ పనికి చేటని అనుకుంటాం కానీ నిజానికి ఆ స్నేహాలే సామర్థ్యాన్ని పెంచుతాయట. కొవిడ్‌ లాక్‌డౌన్‌ తర్వాత వర్క్‌ఫ్రమ్‌ హోమ్‌లూ, హైబ్రిడ్‌ పనివేళలూ పెరిగి ఇలాంటి ‘భేటీల్ని’ కోల్పోయి నందువల్లే- యువతలో ఒంటరితనం పెరుగుతోందట. ఈ ఒంటరితనం తరచూ అనారోగ్యాలూ, మానసిక చికాకులకి దారితీసి దాని ప్రభావం పనిసామర్థ్యంపైనా పడుతోందంటున్నారు ఆక్స్‌ఫర్డ్‌ విశ్వవిద్యాలయానికి చెందిన ప్రొఫెసర్‌ దన్‌బార్‌. కుటుంబసభ్యులూ, బంధువులే కాదు- ఆఫీస్‌ స్నేహాలూ మన వికాసానికి ముఖ్యమంటారాయన. ఆఫీసులోని ఉద్యోగుల మధ్య ఉన్న స్నేహాలూ, పని సామర్థ్యాలపైన గత 30 ఏళ్ళుగా తన బృందంతో కలిసి పలు పరిశోధనలు చేస్తున్నారాయన. ఆ అధ్యయనాలని క్రోడీకరించి ‘ది సోషల్‌ బ్రెయిన్‌- ది సైకాలజీ ఆఫ్‌ సక్సెస్‌ గ్రూప్స్‌’ అన్న పుస్తకాన్ని తీసుకొచ్చారు. వర్క్‌ఫ్రమ్‌ హోమ్‌ పుణ్యమాని అందరూ జూమ్‌మీటింగ్‌లకి పరిమితం కావడం వల్ల ఉద్యోగుల మధ్య ఏ అనుబంధమూ ఉండట్లేదంటున్నారు. అది సంస్థపట్ల ‘నా’ అనే భావనని దెబ్బతీస్తోందని చెబుతున్నారు.