సముద్రపు నాచుతో నేలపైన నాట్లు!

‘మనకి ఆక్సిజన్‌ ఎక్కడి నుంచి వస్తుంది?’ ఈ ప్రశ్న వేస్తే ఎవరైనా సరే ‘చెట్ల నుంచి’ అని చటుక్కున చెప్పేస్తారు. నిజానికి, చెట్లకన్నా ఎక్కువగా మనకి ప్రాణవాయువుని అందించేది సముద్రపు నాచు(ఆల్గే). ప్రపంచంలో ఉన్న 50 శాతం ఆక్సిజన్‌కి అదే మూలకారణం. చెట్లలో ఆక్సిజన్‌ ఎలా వస్తుందో మనం సైన్స్‌ పాఠాల్లో చదువుకుని ఉంటాం. సూర్యరశ్మిని చెట్లు ‘పత్రహరితం’(క్లోరోఫిల్‌)గా మార్చుకుని బతుకుతాయని వినీ ఉంటాం. సముద్రపు నాచు కూడా ఇలాగే చేస్తుంది. కానీ-నేలతో పోల్చుకుంటే సముద్రగర్భంలోకి వెళ్ళే సూర్యకిరణాల శాతం తక్కువ కదా! ఆ తక్కువ కిరణాలతోనే నాచు పత్రహరితాన్ని సమర్థంగా తయారు చేసుకుంటుంది. అందువల్లే దాని పత్రహరితం ఎక్కువ శక్తిమంతంగా ఉంటుంది! సముద్రపు నాచుకి ఇదెలా సాధ్యమవుతోంది అన్నదానిపైన శాస్త్రవేత్తలు చాలాకాలంగా పరిశోధనలు చేస్తూ వచ్చారు. తాజాగా- అందుకు కారణమైన జన్యువుని పసిగట్టారు అమెరికాలోని కాలిఫోర్నియా యూనివర్సిటీ పరిశోధకులు. ఇప్పుడు ఆ జన్యువుని నేలపైనున్న చెట్లలో చొప్పించి పరీక్షలు చేస్తున్నారు. ఇందుకోసం పొగాకు చెట్లపైన ప్రయోగాలు మొదలుపెట్టారు. ఇవి విజయం సాధిస్తే- ఓ ఎకరంతో వచ్చే దిగుబడిని సెంటు స్థలంలో- అతితక్కువ ఎరువులతోనే సాధించవచ్చట.