మంచి నిద్రతో వయసు తగ్గొచ్చు!

మనందరికీ తెలిసిన విషయం ఒకటుంది... మన అసలు వయసుకంటే మనకి మనం ఫీలవుతున్న వయసు వేరు అన్నది. దీన్నే ‘సబ్జెక్టివ్‌ ఏజ్‌’ అంటారు. నిత్యం ఉత్సాహంగా ఉండేవాళ్ళు 55 ఏళ్ళలో ఉన్నా 45లో ఉన్నట్టే ఫీలవుతారు- ఆ మాట బయటకు చెప్పకున్నా సరే. అదే ఎప్పుడూ డీలాగా ఉండేవారు 35 ఏళ్ళలోనూ తమకి తాము 40ల్లో ఉన్నట్టు భావిస్తారు. ‘ఈ తేడా ఎందుకొస్తోంది? ఈ భావనకీ నిద్రకీ ఏదైనా సంబంధం ఉందా?’ అన్న సందేహం వచ్చింది ఇటీవల స్వీడన్‌లోని కెరోలిన్‌స్కా వర్సిటీ పరిశోధకులకి. దానిపైన- 186 మందితో అధ్యయనానికి నడుంబిగించారు. వాళ్ళని రెండువారాలు తొమ్మిదిగంటలపాటు నిద్రపొమ్మన్నారు. అదయ్యాక- ఓ రెండురోజుల పాటు నాలుగుగంటలే నిద్రపోనిచ్చారు. ఆ రెండు సందర్భాల్లోనూ వాళ్ళ ఉత్సాహాన్నీ, చురుకుదనాన్నీ, తద్వారా వాళ్ళ ‘సబ్జెక్టివ్‌ ఏజ్‌’నీ అంచనావేశారు. మొదటి రెండువారాలు కంటి నిండా నిద్రపోయి నప్పుడు- ప్రతిరోజూ తమ వయసు 0.23 ఏళ్ళు(దాదాపు రెండు న్నర నెలలు) తగ్గుతున్నట్టు ఫీలయ్యారట ఈ అధ్యయనంలో పాల్గొన్నవారు. అదే- నిద్ర తగ్గినప్పుడు వయసు నాలుగు న్నరేళ్ళు పెరిగినట్టు భావించారట. దీన్నిబట్టి నిద్రకీ సబ్జెక్టివ్‌ ఏజ్‌కీ చాలా దగ్గర సంబంధం ఉందని రూఢీ అయ్యిందంటున్నారు పరిశోధకులు.