రోబోలు మాట్లాడుకుంటే?!

‘ఏం... ఇప్పటిదాకా రోబోలు మాట్లాడుకోలేదా?’ అన్న సందేహం రావొచ్చు మీకు! రెండు రోబోలు సంభాషించడం కాదు కదా... అసలు మనిషి మాటని విని తు.చ.తప్ప కుండా పాటించే రోబో కూడా ఇప్పటిదాకా ప్రపంచంలో లేదు. కానీ- ఆ దిశగా తాజాగా ఓ ముందడుగు పడింది. ప్రస్తుతం ఏఐకి సంబంధించి ప్రపంచంలో రెండురకాల పరిశోధనలు జరుగుతున్నాయని చెప్పొచ్చు. ఒకటి- మెషీన్‌ లెర్నింగ్‌ పద్ధతిలో ‘ఏఐ’కి రకరకాల ముందస్తు సమాచారాన్ని అందించి వాటికి శిక్షణ ఇవ్వడం. చాట్‌జీపీటీలాంటి ఏఐ మోడళ్ళ వెనకున్నది ఈ పద్ధతే. రెండో రకం పరిశోధన- ఏఐ కోసం మనిషి మెదడుని పోలిన సాంకేతికతని సృష్టించడం. న్యూరోలింగ్విస్టిక్‌ ప్రాసెసింగ్‌(ఎన్‌ఎల్‌పీ) వంటివాటితో దీనిపైన ప్రయోగాలు చేస్తున్నారు. ఈ రెండో పరిశోధనల్లో భాగంగా- ఓ ఏఐ రోబోకి కేవలం నోటిమాటద్వారా సూచన ఇచ్చి అది పనిచేసేలా తీర్చిదిద్దారు జెనీవా యూనివర్సిటీ శాస్త్రవేత్తలు. అంటే, ఈ రోబో ఓ మనిషిలా పక్కవాళ్ళ మాట వింటోందన్నమాట! ఇదివరకటి రోబోలన్నీ కేవలం తమకు ముందుగా ఇచ్చిన సూచనని మాత్రమే పాటించేవి. ఈ తాజా ‘ఏఐ’ కొత్త సూచనల్ని పాటించడమే కాదు- తనపక్కనున్న మరో రోబోకి ఆ సమాచారాన్నిచ్చి, దానిచేతా పనిచేయిస్తోందట. అంటే, అవి రెండూ మాట్లాడుకుంటున్నాయన్నమాట! అందుకే ‘ఏఐ’కి సంబంధించి ఇదో పెద్ద ముందడుగని చెబుతున్నారు.