మెదడు సైజు పెరుగుతోందట!

ఆల్జీమర్స్‌, డిమెన్షియా- ఈ మధ్య ఎక్కువగా వినిపిస్తున్న సమస్యలివి. నిజానికి- ఒకప్పటికన్నా ఈ సమస్య తగ్గుతోందని చెబుతున్నారు పరిశోధకులు. వాళ్ళు ఈ నిర్ణయానికి ఎలా... ఎందుకు వచ్చారో తెలియాలంటే అమెరికాలోని కాలిఫోర్నియా యూనివర్సిటీ- డావిస్‌(యూసీ డావిస్‌) శాస్త్రవేత్తలు చేపట్టిన ‘ఫర్మింగ్‌హామ్‌ హార్ట్‌ స్టడీ’ గురించి తెలుసుకోవాలి. 1948 నుంచీ ప్రపంచంలోని గుండె సమస్యలపైన సాగుతున్న సుదీర్ఘ పరిశోధన ఇది. ఈ పరిశోధనలో భాగంగా తీసిన- మనుషుల మెదడుకి సంబంధించిన స్కాన్‌లని ఈ మధ్య శాస్త్రవేత్తలు విశ్లేషించారు. అందులో ఓ కొత్త విషయం తెలిసింది. అదేమిటంటే- 1930ల్లో పుట్టిన మానవులకన్నా, 1970ల తర్వాత పుడుతున్న మనుషుల మెదడు సైజు గణనీయంగా పెరుగుతోందట. చక్కటి పోషకాహారం లభించడం, చదువులు పెరగడమే దీనికి కారణమని పరిశోధకులు చెబుతున్నారు. ఇలా పెరగడం వల్ల ఆల్జీమర్స్‌ వంటి వ్యాధులూ తగ్గుతున్నాయంటున్నారు. మెదడు పెద్దగా కావడమంటే- అందులోని న్యూరాన్‌ల సంఖ్య కూడా అధికం కావడమన్నది ఈ శాస్త్రవేత్తల భావన. అదే ఆల్జీమర్స్‌లాంటి వ్యాధుల్ని తగ్గిస్తూ ఉండొచ్చని విశ్లేషిస్తున్నారు. ప్రపంచవ్యాప్తంగా వృద్ధులు పెరుగుతున్నందువల్ల ఈ సమస్యలు ఎక్కువైనట్టు అనిపిస్తోందికానీ- జనాభాశాతంతో పోలిస్తే ఆల్జీమర్స్‌ సమస్యలు తగ్గుతున్నాయనే అంటున్నారు.