విందు ఖరీదు లక్ష రూపాయలు!

ఎంత పెద్ద స్టార్‌ హోటలైనా సరే ఓ వ్యక్తి భోజనం చేయడానికి- ఎక్కువలో ఎక్కువగా 10 వేల రూపాయలు కావొచ్చు. కానీ అక్కడేమో మనిషికి లక్షరూపాయలని ప్రకటించారు. అలాగని అది స్టార్‌హోటల్‌ని తలదన్నే ఇంద్రభవనమేం కాదు. అదో మామిడితోట... పైగా ఆ విందు ఏర్పాటుచేసిందేమో ఆరుబయట. అయినా సరే- టికెట్లు హాట్‌ కేకుల్లా అమ్ముడుపోయాయి. 105 మంది హాజరైపోయారు. వాళ్ళని బ్యాండుమేళంతో తీసుకెళ్ళి పొడవైన డైనింగ్‌ టేబుల్‌ ముందు కూర్చోబెట్టారు. దాదాపు మూడుగంటలపాటు సాగిందా భోజన కార్యక్రమం. ‘అంతసేపు తిన్నారా..?’ అనుకుంటున్నారేమో! మధ్యమధ్య కాస్త విరామం ఇచ్చి- వాళ్ళు తింటున్న, తినబోతున్న భోజనం స్పెషాలిటీ ఏమిటో వివరించారు మనదేశంలోని 20 మంది ప్రసిద్ధ షెఫ్‌లు! మొత్తానికి భోజనం చేయడాన్ని కూడా ఓ ఉత్సవంలా మార్చారక్కడ! ఎక్కడ అంటారా... చెన్నైలోని ‘హనురెడ్డి మ్యాంగోఫార్మ్స్‌’లో జరిగిందీ కార్యక్రమం. ఇందుకోసం 8000 చదరపుటడుగులతో ప్రత్యేక కిచెన్‌ని ఏర్పాటుచేయడం మరో విశేషం!