తల్లికోసం ‘పొద్దుతిరుగుడు’ పంట!

ఆమె పేరు భవాని. 80 ఏళ్ళు. ఆల్జీమర్స్‌ సమస్యతో బాధపడుతోంది. జీవితమంతా వ్యవసాయం చేసి ఇప్పుడు పిల్లల పంచనచేరిన ఆమె- కొడుకులకి తన మనసులోని ఓ తీరని కోరిక గురించి చెప్పింది. అదేమిటంటే- ఒక్కసారైనా పొద్దుతిరుగుడు పంట చూడాలని. ‘ఓస్‌... ఇంతేనా అనిపిస్తుంది’ కానీ కేరళలో వాళ్ళుంటున్న కొచ్చి ప్రాంతంలో ఆ పంట చాలా అరుదు. అక్కడి మట్టిలో అవి ఎదగవు. మరి ఆమెకి ఆ పంటని చూపించాలంటే వందల కిలోమీటర్ల దూరంలో ఉన్న పాలక్కాడుకి వెళ్ళాలి. తమ తల్లిని ఆ వయసులో అంత దూరం తీసుకెళ్ళడం అయ్యే పని కాదు. అయినాసరే తల్లి కోరిక తీర్చాలనుకున్నారు ఆమె కొడుకులు- విజయన్‌, గిరి, శశి. తమ బిల్డింగ్‌ పక్కనున్న 50 సెంట్ల భూమిని సాగు క్షేత్రంగా మార్చారు. పొద్దుతిరుగుడు మొక్కల్ని నాటారు. వ్యవసాయ శాస్త్రవేత్తల సలహాలు తీసుకుంటూ అతి జాగ్రత్తగా పెంచారు. చూస్తుండగానే కనులపండువగా విప్పారాయి పూలు! వాటిని చూసి భవాని ఆనందం అంతాఇంతాకాదు. ఆకాశహర్మ్యాలతో నిండిన ఈ ప్రాంతంలో పసుపు పచ్చగా విచ్చుకున్న పొద్దుతిరుగుడు పూల మధ్య సెల్ఫీలు దిగడానికి యువత క్యూ కడుతున్నారు!