టీచర్లకే నేర్పిస్తున్నారు!

బిహార్‌ మారుమూల ప్రాంతాల్లోని స్కూళ్లలో పని చేయడానికి మహిళా టీచర్లు ఇష్టపడలేదు. కొందరేమో సమయానికి స్కూలుకు హాజరు కాకపోవడం, తరచూ సెలవులు పెడుతుండటం గమనించారు విద్యాశాఖ అధికారులు. టీచర్లు అక్కడ పని చేయడానికి ఇష్టపడక కాదనీ- రోడ్డు వసతి లేక రవాణా సదుపాయాలకు దూరంగా ఉన్న ఆ గ్రామాలకు చేరుకోలేకపోవడమే అసలు కారణమని తెలుసుకున్నారు. అందుకే బిహార్‌ రాష్ట్ర విద్యాపరిశోధన, శిక్షణ మండలి ఓ ఆలోచన చేసింది. స్కూలు పని వేళల్లోనే రోజుకు ఓ గంట మహిళా టీచర్లకి స్కూటీ నడపడం నేర్పిస్తోంది. కొత్తగా నియామకం అయిన వారికి విధుల్లో చేరక ముందే డ్రైవింగ్‌ నేర్పించి లైసెన్స్‌ కూడా అందిస్తోంది. రాయితీతో స్కూటీలు కొనుక్కోవడానికీ ప్రోత్సహిస్తోంది. మూడు నెలలుగా బిహార్‌ ప్రభుత్వం చేపడుతున్న ఈ కార్యక్రమం వల్ల డ్రైవింగ్‌ నేర్చుకున్న దాదాపు వంద మంది టీచర్లు స్కూటీలపైన సమయానికి స్కూళ్లకు చేరుకుంటున్నారు. ఎక్కువ సమయం కూడా కేటాయించి గ్రామీణ విద్యార్థులకు అదనపు తరగతులు కూడా  నిర్వహిస్తున్నారు. విద్యార్థులకోసం ప్రభుత్వం చేసిన ఈ ఆలోచన బాగుంది కదూ!