చెక్కతో ఉపగ్రహం

అంతరిక్షంలో ఉండే కఠిన పరిస్థితులను తట్టుకునేలా ఉపగ్రహాలను స్టీలు, టైటానియం, అల్యూమినియం, ప్లాస్టిక్‌ తదితరాలతో ప్రత్యేకమైన మెకానిజంతో రూపొందిస్తారు. జపాన్‌ మాత్రం అందుకు భిన్నంగా పర్యావరణహితంగా చెక్కతో శాటిలైట్లను తయారు చేసింది. ట్రయల్‌ రన్‌తో విజయం సాధించిన జపాన్‌ ప్రపంచంలోనే తొలిసారి చెక్కతో ఉపగ్రహాలను రూపొందించి, ప్రయోగించే దేశంగా గుర్తింపునూ సొంతం చేసుకోనుంది. ఉపగ్రహం తయారీలో వాడే లోహాలు ఓజోన్‌పొరను దెబ్బ తీస్తాయనే ఉద్దేశంతో క్యోటో యూనివర్సిటీకి చెందిన శాస్త్రవేత్తలు ఈ ప్రయోగాన్ని చేశారు. అందుకోసం చంపక వృక్షాన్ని ఎంపిక చేసుకున్నారు. ఎలాంటి వాతావరణంలోనైనా పగుళ్లు రాకుండా దృఢంగా ఉంటుందని ఆ చెట్టు కలపను ఎంపిక చేసుకున్న శాస్త్రవేత్తలు... దానిపై ఎన్నో పరిశోధనలు చేశారు. ఆ కలపతో తయారుచేసిన శాటిలైట్‌ను త్వరలోనే అంతరిక్షంలోకి పంపి ప్రయోగాలు చేయనున్నారు.