అమ్మలా చూసుకుంటారు!

పోలీసులకు నిర్ణీత పని వేళలంటూ ఉండవు. ఎక్కువ సమయం విధుల్లోనే ఉండాల్సి వస్తుంది. అలాంటప్పుడు ఇంట్లో పిల్లలుండీ వారిని చూసుకునేవారెవరూ లేకపోతే చాలా ఇబ్బంది అవుతుంది. ఈ కారణం వల్ల ఉద్యోగాలు మానేసిన కానిస్టేబుళ్లను ఎందరినో తన సర్వీసులో చూశారు- 2011 ఐపీఎస్‌ బ్యాచ్‌ అధికారిణి స్వప్న మేష్రమ్‌. బిహార్‌లోని ఔరంగాబాద్‌ జిల్లా ఎస్పీగా పని చేస్తున్న ఆమె రెండు నెలల క్రితం పోలీస్‌ శాఖలో పని చేసే ఉద్యోగుల పిల్లల కోసం తన సొంత ఖర్చుతో ఓ క్రెచ్‌ను ప్రారంభించారు. అక్కడ ఉదయం తొమ్మిది నుంచి సాయంత్రం ఆరు గంటలవరకూ ఆయాలతోపాటు ఇద్దరు కానిస్టేబుళ్లూ ఆ చిన్నారుల బాగోగులు చూస్తున్నారు. వైద్యులు కూడా రెండు పూటలా పిల్లల్ని చూసి వెళుతుంటారు. ఈ కేంద్రంలో ఉన్న సిబ్బంది పిల్లలకు ఆహారం అందించి ఆలనా పాలనా చూసుకోవడంతోపాటు హోమ్‌వర్క్‌లు కూడా చేయిస్తారు. ప్రస్తుతం ఔరంగాబాద్‌తోపాటు చుట్టుపక్కల ప్రాంతాల్లోని పోలీస్‌ ఉద్యోగులు దాదాపు యాభై మంది ఈ సేవలను వినియోగించుకుంటూ... పిల్లల గురించి చింత లేకుండా పని చేసుకుంటున్నారు. ఎస్పీ ఆలోచనకూ, తీసుకున్న చొరవకూ అధికారులు మెచ్చుకోవడంతోపాటు ప్రభుత్వ నిధుల్ని కేటాయించడానికి ఆదేశాలు జారీ చేశారు.