ఆపరేషన్‌ గరుడ!

పోలీస్‌ శాఖలో జాగిలాలనూ, గుర్రాలనూ వినియోగించడం మనకు తెలిసిందే. అందుకోసం హైదరాబాద్‌లో ఏర్పాటు చేసిన ‘ఇంటిగ్రేటెడ్‌ ఇంటెలిజెన్స్‌ ట్రైనింగ్‌ అకాడమీ’(ఐఐటీఏ)లో వాటికి ప్రత్యేకంగా శిక్షణ కూడా ఇస్తుంటారు. ఈసారి ఆ జంతువులతోపాటు డేగలకు కూడా ట్రైనింగ్‌ ఇచ్చారు నిపుణులు. విజయవంతంగా శిక్షణ పూర్తి చేసుకుని నిఘా విభాగంలో చేరడానికి సిద్ధమైన ఆ డేగలు ఇక నుంచి అడవుల్లో కూంబింగ్‌ దళాలతో కలిసి విధులు నిర్వహిస్తాయి. అక్కడ మావోయిస్టులు అనధికారికంగా ఎగుర వేసే డ్రోన్లపై దాడి చేసి వాటిని తీసుకొచ్చి పోలీసు సిబ్బందికి ఇవ్వడమే వీటి పని. డేగలు- పావురాల కంటే వేగంగా ఎగురడంతోపాటు తుపాను సమయంలోనూ మేఘాల కంటే ఎత్తులోకి వెళతాయి కాబట్టి నిఘా పనులకు వాటిని ఎంచుకుంది పోలీస్‌ శాఖ. నల్లమల అడవుల నుంచి తీసుకొచ్చి మొయినాబాద్‌ అడవుల్లో శిక్షణ ఇప్పించిన మూడు డేగలు- వేగంగా ఆకాశంలో ఎగిరే డ్రోన్లపై దాడి చేసి వాటిని తెచ్చి పోలీసులకు ఇస్తున్నాయి. ఇక మీదట వీటిని అడవుల్లోనే కాదు... డ్రోన్ల నిషేధం ఉన్నచోట కూడా కాపలా ఉంచేందుకు ఏర్పాట్లు చేస్తున్నారు తెలంగాణ పోలీస్‌ అధికారులు.