కూరల కాంబో ఇది!

కర్రీపాయింట్‌కి వెళ్లి కూరలు ఇవ్వమని అడగ్గానే ఓ ప్లాస్టిక్‌ కవరులో వేసి... దారంతో చుట్టిస్తారు. లేదంటే ఆ కవరునే ముడివేసి చేతిలో పెడతారు. అదే ఆన్‌లైన్‌లో హోటల్‌ నుంచి ఆర్డరు పెట్టుకుంటే అల్యూమినియం ఫాయిల్‌ కవరులోనో ప్లాస్టిక్‌ డబ్బాలోనో కూరను ప్యాక్‌ చేసి ఇస్తారు. చెన్నైలోని మాంబలం ప్రాంతానికి చెందిన మనీష్‌ జైన్‌ మాత్రం ఆ కూరల్ని చక్కగా గాజు సీసాల్లో పెట్టి ఇస్తాడు. ఆ సీసాలను అలా చేతిలో పెట్టడం కాకుండా... వాటిని చక్కగా ప్యాకింగ్‌ చేసి అందిస్తుంటాడు. ‘కుళంబు బాక్స్‌’(కూర డబ్బా) పేరుతో ఓ షాపు పెట్టి కూరల్ని వైవిధ్యంగా అందిస్తున్న మనీష్‌- ఎవరైనా స్నేహితులకీ, కుటుంబసభ్యులకీ వాటిని బహుమతిగా కూడా ఇచ్చే ఏర్పాట్లు చేస్తున్నాడు.ముందు రోజే ఏ కూరలు కావాలో చెబితే వాటిని గాజు సీసాల్లో పెట్టి కాంబో ప్యాక్‌ను సిద్ధం చేస్తాడు.ఎవరికి ఎక్కడ ఇవ్వాలో చెబితే చాలు డెలివరీ కూడా అందిస్తుంటాడు.ఎక్కడున్నా ఆత్మీయులకు నచ్చిన కూరలతో విందును ఏర్పాటు చేయొచ్చు కదా!