పెళ్లి చేసి ఆశ్రయమిస్తారు!

తోడబుట్టిన వాళ్లే ఒక మాట మీద ఉండట్లేదు ఈ రోజుల్లో. వందల ఏళ్లుగా కొన్ని కట్టుబాట్లు పెట్టుకుని ఊరంతా ఒకే తాటి మీదే నడుస్తోందంటే ఆశ్చర్యమే కదా. హిమాచల్‌ప్రదేశ్‌లోని పర్యటక ప్రాంతమైన ‘కులూ’కు దగ్గర్లో ఉంటుంది షాంగ్‌చుల్‌ గ్రామం. ఎన్నికల సమయంలో తప్ప ఆ గ్రామంలోకి పోలీసులను అడుగుపెట్టనివ్వరు. గొడవలకీ, వివాదాలకీ తావుండదు. మద్యపానం, ధూమపానం నిషేధం అక్కడ. ఎవరూ పెద్ద గొంతుతో మాట్లాడరు. వ్యవసాయమే జీవనాధారమైన ఆ గ్రామ సరిహద్దుల్లో మహదేవ్‌ ఆలయముంది. అక్కడ పెళ్లి చేసుకోవడానికి వచ్చిన ప్రేమికులకు పురోహితులూ గ్రామస్థులూ దగ్గరుండి పెళ్లి చేసి, వారికి ఆరు నెలలపాటు ఆశ్రయమూ కల్పిస్తారు. కోరుకున్న వారికి జీవనోపాధి కూడా చూపిస్తారు. పోలీసు కేసులూ, గొడవలూ లేకుండా ఆ దంపతుల కుటుంబసభ్యులతో మాట్లాడి వారిని సంతోషంగా సాగనంపుతుంటారు. మహాభారత కాలంలో కౌరవులకు భయపడిన పాండవులు మహదేవ్‌ ఆలయంలో తలదాచుకున్నారట. పాండవులకోసం ప్రత్యక్షమైన మహదేవుడు కౌరవుల్ని తరిమికొట్టి... తన దగ్గర ఆశ్రయం కోసం వచ్చినవారికి హాని చేయొద్దని  చెప్పాడట. అందుకని ఆ గ్రామస్థులు ఆపదలో ఉన్నవారిని ఆదుకుంటున్నారట.