మొక్కుతీరితే బొమ్మలు!

తలనీలాలిస్తామనో, మోకాళ్లతో గుడి మెట్లెక్కుతామనో, పొర్లుదండాలు పెడతామనో, వెయ్యిన్నూట పదహార్లు చెల్లించుకుంటామనో- దేవుడి దగ్గర తమ కోరికలు విన్నవించుకుంటారు భక్తులు. తీరాక మొక్కులు చెల్లించుకుంటారు. కానీ ఆ ఆలయంలో మొక్కుగా బొమ్మల్నే చెల్లిస్తారు. పెళ్లయి ఎన్నేళ్లయినా కడుపు పండనివాళ్లు- పిల్లలు పుట్టాక తల్లీపిల్లల బొమ్మనీ, కుటుంబంలో కలహాలొచ్చి మళ్లీ కలిస్తే - భార్యాభర్తల జంట ప్రతిమల్నీ, తమవాడు ఇంజినీరో డాక్టరో అయితే ఆ విగ్రహాల్నీ ఇలా సమర్పించుకుంటారక్కడ. పుదుచ్చేరికి దగ్గర మన్నంబాక్కం అనే ఊళ్లో ఉంటుందీ గుడి. అళగు ముత్తు అళగర్‌ చిత్తర్‌ అన్న ఈ ఆలయంలో సుమారు 300 ఏళ్లుగా ఈ ఆచారం సాగుతోంది. గుడి చిన్నదే కానీ, దాని చుట్టూ రెండెకరాల మేర ఈ బొమ్మలే కొలువై ఉంటాయి. భక్తులు ఇంకెక్కడో బొమ్మల్ని చేయించక్కర్లేకుండా ఈ ఆలయ ప్రాంగణంలోనే వాటిని రూపొందించి అందించడానికి ప్రత్యేకంగా కళాకారులూ ఉంటారిక్కడ!