బిడ్డను కంటే రూ.62 లక్షలు బోనస్‌!

పిల్లల్ని కంటే తల్లిదండ్రులకు జీతంతో కూడిన సెలవులు ఇవ్వడం అన్నిచోట్లా ఉన్నదే. దక్షిణ కొరియాకి చెందిన సంస్థ బూయాంగ్‌ గ్రూపు మరొకడుగు ముందుకేసి తన సిబ్బందికి ఏకంగా రూ.62 లక్షల నగదు(కొరియా కరెన్సీలో వంద మిలియన్‌ వన్లు) బోనస్‌గా చెల్లిస్తానని ప్రకటించింది. ఎంత మంది పిల్లల్ని కంటే అన్నిసార్లూ ఇంత మొత్తం ఇవ్వనుంది. ఎందుకలా అంటే- గత కొంతకాలంగా కొరియాలో యువత కెరీర్‌ యావలో పడి పిల్లల్ని కనడానికి ఇష్టపడటం లేదట. ముఖ్యంగా మహిళలు పిల్లల కోసం కెరీర్‌ని వదులుకోవడానికి సిద్ధంగా లేరు. పిల్లల్ని పెంచడానికి అయ్యే ఖర్చు కూడా మరొక కారణం. దాంతో సంతాన సాఫల్యత రేటు (0.72) బాగా పడిపోయింది. ఇది ఇలాగే కొనసాగితే ఈ శతాబ్దం చివరికల్లా దేశజనాభా సగానికి తగ్గిపోతుందట. దాంతో కంపెనీలు ఒకదానితో ఒకటి పోటీపడి మరీ పిల్లల్ని కనే ఉద్యోగులకు బోనస్‌లు ప్రకటిస్తున్నాయి.