బంగారు కుల్ఫీ!

వేసవి కాలం రాగానే ఐస్‌క్రీములకూ కుల్ఫీలకూ డిమాండ్‌ బాగా పెరుగుతుంది. కానీ ఇందౌర్‌లోని ప్రకాశ్‌ కుల్ఫీవాలా షాపుకి మాత్రం ఏడాది పొడుగునా గిరాకీనే. అది కేవలం కుల్ఫీ షాపు కాదు, పర్యటకులకు సందర్శక ప్రాంతం కూడా. కుల్ఫీ షాపులో అంతగా చూడడానికి ఏముంటాయీ అంటారా... రెండు కిలోల బంగారు ఆభరణాలను ధరించిన ఆ షాపు యజమానిని చూడడానికీ, 24 క్యారట్ల బంగారు ఫాయిల్‌తో అలంకరించి అతను తయారుచేసి ఇచ్చే కుల్ఫీ, ఫలూదాలను రుచి చూడడానికీ... సందర్శకులు క్యూకడతారట. వినియోగదారులు కోరిన ఫ్లేవర్‌ కుల్ఫీకి పైన గోల్డెన్‌ ఫాయిల్‌ చుట్టి ఇచ్చి పది రూపాయల కుల్ఫీని 350 రూపాయలకు అమ్ముతున్నాడు ప్రకాశ్‌. బంగారం అంటే తనకిష్టమనీ అందుకే తాను నగలు ధరించడమే కాక, కుల్ఫీకీ బంగారపు మెరుపులు అద్దుతున్నాననీ అనే ప్రకాశ్‌ తాను కుల్ఫీ ఖరీదు తీసుకోవడం లేదనీ బంగారానికి మాత్రమే తీసుకుంటున్నాననీ చెబుతాడు.