ఆ ఊళ్ల పేర్లు... మామిడి!

స్థానికంగా ప్రాధాన్యం సంతరించుకున్న వాటి పేరును గ్రామాలకు పెట్టడం మనకు తెలుసు... వేసవిలో పిన్నల నుంచీ పెద్దల వరకూ ఇష్టపడే మామిడి పండు పేరునే ఏకంగా ఓ నలభై గ్రామాలకు పెట్టేసుకున్నారు ఒడిశావాసులు. ఒడియాలో మామిడిని అంబ అంటారు. గిరిజన జనాభా ఎక్కువగా ఉన్న  ఆ రాష్ట్రంలోని మల్కన్‌గిరి, కోరాపుట్‌, నబరంగాపుర జిల్లాల్లోని చాలా గ్రామాలు వందల ఏళ్లుగా మామిడి తోటలూ, ఆ ఉత్పత్తుల మీదే ఆధారపడి బతుకుతున్నాయి. జీవనోపాధికి మూలమైన మామిడి మీద ఇష్టంతోనే ఆ జిల్లాల్లోని చాలా గ్రామాలు పేరుకు ముందో వెనకో ‘అంబ’ అనే పదాన్ని చేర్చుకున్నాయి. హతియాంబ, అంబపద, మంత్రియాంబ, మాచియాంబ, కంకదాంబ, అంబగూడ, జడంబా... ఇలా దాదాపు నలభై గ్రామాల సరసన మామిడి చేరిపోయిందన్నమాట.