ఊరంతా ఊడ్చాకే...

పల్లెల్లో ఉదయాన్నే లేవగానే ఎవరి వాకిళ్లు వాళ్లు శుభ్రం చేసుకుంటుంటారు. కేరళలోని ప్రమదోమ్‌ పంచాయతీకి చెందిన సుధీశ్‌ కుమార్‌ మాత్రం లేవగానే ఇంటి పరిసరాలతోపాటు గ్రామంలోని రోడ్లన్నీ ఊడ్చాకే దినచర్య మొదలుపెడతాడు. ఎన్నికల సమయం కాబట్టి ఊరంతా ఊడ్చేసి మార్కులు కొట్టేసే రాజకీయనాయకుడేమో అనుకుంటారేమో కానీ అతనో సామాన్య రైతు. దాదాపు పదేళ్లుగా ఏమీ ఆశించకుండా బాధ్యతగా గ్రామాన్నీ, పరిసరాల్నీ పరిశుభ్రంగా ఉంచడంతోపాటు... మూగజీవుల్నీ ఆదరిస్తుంటాడు. అటవీశాఖాధికారిగా పనిచేసిన తండ్రి స్ఫూర్తితో మూగజీవులకు సేవ చేయడంతోపాటు పుట్టి పెరిగిన ఊరికోసం తనవంతుగా ఏదైనా చేయాలని పరిసరాలను శుభ్రం చేస్తున్న సుధీశ్‌ అంటే గ్రామస్థులకు ఎంతో అభిమానం. ఆయన మాటంటే గౌరవం. అందుకే ఎన్నికల వేళ గ్రామమంతా ప్రచారం చేయడానికి బదులు రాజకీయ నాయకులు ఓట్ల కోసం సుధీశ్‌ ఒక్కరింటికే వెళ్లి ఆయన మద్దతు కోరుతుంటారట.