గూడంటే గూడూ కాదు...

బస్టాండ్‌లో ఎవరైనా బస్సులకోసం ఎదురు చూస్తుంటారు. ఒకవేళ బస్సులు ఎంతకీ రాకపోతే పక్కన వాళ్లతో మాట్లాడటమో, ఫోన్‌ చూసుకోవడమో చేస్తుంటారు. కర్ణాటకలోని దక్షిణ కన్నడ జిల్లాలోని ప్రయాణికులు మాత్రం అలా చేయరు. కూర్చుని శ్రద్ధగా పుస్తకాలు చదువుకుంటూ ఉంటారు. పుస్తకాలు చదువుకుంటే బస్సు వెళ్లిపోతుందేమో అనుకోవచ్చు... అందుకే ఆ బస్టాపులో బస్సులు కాసేపు ఆగి మరీ చదువుకునేవారిని ఎక్కించుకుంటాయి. పుస్తకాలు చదివే వారి సంఖ్య తగ్గిపోయిందనీ, చాలామంది ఇళ్లలో అసలు పుస్తకాలే ఉండట్లేదనే ఉద్దేశంతో ఆ జిల్లా కలెక్టర్‌ కుమార పల్లెటూరి బస్టాండ్లలో ‘పుస్తక గూడు’ పేరుతో లైబ్రరీలను ఏర్పాటు చేయడం మొదలుపెట్టారు. గతేడాది నుంచి బస్టాండ్లను అభివృద్ధి చేయడంతోపాటు పుస్తకాలనూ అందుబాటులో ఉంచుతూ పిల్లల్నీ పెద్దల్నీ చదివించే ప్రయత్నం చేస్తూ ఇప్పటి వరకూ దాదాపు 300 ప్రాంతాల్లో పుస్తక గూళ్లను ఏర్పాటు చేశారు. వాటిలో జనరల్‌ నాలెడ్జీ, చరిత్ర, టెక్నాలజీ, కథలూ, నవలలూ, పోటీ పరీక్షలకు సంబంధించిన పుస్తకాలెన్నో ఉంచారు.