పొంగళ్లు ప్రత్యేకం!

కోరిన కోర్కెలు తీరినప్పుడో, ప్రత్యేక సందర్భాల్లోనో, ఆలయ ఉత్సవాల్లో భాగంగానో- మహిళలు పొంగళ్లు చేసి దేవుడికి నివేదించడం అన్ని ఆలయాల్లోనూ చూస్తుంటాం. అన్నమయ్య జిల్లా తిప్పాయపల్లెలోని శ్రీసంజీవరాయ స్వామి ఆలయ ప్రాంగణంలో మాత్రం మగవాళ్లే పొంగళ్లు చేస్తూ కనిపిస్తారు. ఆ పొంగలిని వాళ్లే తలమీద పెట్టుకుని ఊరంతా తిరిగాక స్వామికి సమర్పిస్తారు. వ్యవసాయం, పశుపోషణే జీవనాధారమైన ఆ ప్రాంతంలో ఐదొందల ఏళ్ల క్రితం కరవు వచ్చిందట. పశువులూ వ్యాధులపాలై మృత్యువాత పడ్డాయట. ఆ సమయంలో గ్రామానికి వచ్చిన ఓ సాధువు ప్రజల కష్టాలను తొలగించాలనే ఉద్దేశంతో బీజాక్షరాలను లిఖించిన ఓ శిలను ప్రాణప్రతిష్ఠ చేశాడట. అప్పట్నుంచీ ఆ శిలను సంజీవరాయ స్వామిగా ఆరాధిస్తూ- మగవారు పొంగళ్లు చేయడం మొదలుపెట్టాక ఆ గ్రామంలో సమస్యలన్నీ దూరమ య్యాయట. అందుకే ఇప్పటికీ ఆ ఆచారాన్ని కొనసాగిస్తూ ప్రతి ఆదివారం సంజీవరాయుడి చెంత మొక్కులు తీర్చుకునే భక్తులు కనిపిస్తారు. చుట్టుపక్కల రైతులతోపాటు పొరుగు రాష్ట్రాల భక్తులు కూడా పెద్ద ఎత్తున ఇక్కడికి వస్తుంటారు.

వి.వీరగంగాధర శర్మ, కడప డెస్క్‌