చదివించే హోటల్‌!

సాధారణంగా హోటల్‌కి వెళ్లగానే ముందుగా ప్లేట్లూ, చెంచాలూ, ఫోర్కులూ టేబుల్‌పైన పెట్టి తరవాత ఆర్డర్‌ అడిగి తీసుకుంటారు. నాసిక్‌లోని ఓజర్‌ ప్రాంతంలోని ఓ హైవే పక్కనే ఉన్న ‘పుస్తకాంచల్‌’ అనే హోటల్‌కి వెళ్లగానే టేబుల్‌పైన కొన్ని పుస్తకాలు ఉంచుతారు. ఇష్టమైన పుస్తకాలేంటో అడిగి వెంటనే తెచ్చిస్తారు. ఆర్డరిచ్చిన ఐటమ్స్‌ వచ్చే వరకూ కస్టమర్లు ఎంచక్కా వాటితో కాలక్షేపం చేయొచ్చు. రుచికరమైన ఆహారంతోపాటు సాహిత్యాన్నీ అందిస్తున్న ఆ హోటల్న్‌ు నడిపేది సాహితీవేత్తనో లేక విద్యావేత్తనో అనుకుంటే పొరపాటే. ఓనమాలు కూడా చదువుకోని డెబ్భై నాలుగేళ్ల భీంబాయి. చదువుకు ప్రాణమిచ్చే ఆమెను తల్లిదండ్రులు చదివించకపోగా, ఓ తాగుబోతు చేతిలో పెట్టారు. భర్త ఇబ్బందులు పెట్టినా పిల్లల్ని  కష్టపడి చదివించింది. వాళ్లు మంచి ఉద్యోగాల్లో స్థిరపడ్డాక భీంబాయి ఓ హోటల్‌ను ప్రారంభించి- ఆసక్తికొద్దీ పుస్తకాలనూ అందుబాటులో ఉంచుతోంది. ఇప్పుడక్కడ నవలలూ, కథలూ, చిన్నారుల పుస్తకాలూ, ఆత్మకథలూ తదితర పుస్తకాలన్నీ కలిపి దాదాపు ఐదువేల దాకా ఉన్నాయి. హోటల్‌కి వెళ్లిన వాళ్లు కావల్సినవి చదువుకోవచ్చూ... ఇంటికీ తెచ్చుకోవచ్చూ.