బంకు చల్లగుండా...

భగభగమంటూ భానుడు తన  ప్రతాపాన్ని చూపిస్తుండటంతో- ఇంట్లోంచి కాలు బయటపెట్టాలంటేనే భయమేస్తోంది. ఎండా,వడగాలులూ తీవ్ర కలవరానికి గురి చేస్తున్నాయి. అలాగని రోజంతా ఏసీలో ఉండాలన్నా కష్టమే. అది అందరికీ సాధ్యంకాకపోవచ్చు కూడా. అయితే తమ పెట్రోలు బంకులో ఆరు బయట మండే ఎండలో పనిచేసే సిబ్బందికీ, అక్కడికొచ్చే కస్టమర్లకూ ఉపశమనాన్ని ఇవ్వాలనుకున్నాడో యజమాని. కరీంనగర్‌కు చెందిన అతను దాదాపు లక్షరూపాయలు ఖర్చుపెట్టి యాభై స్ప్రింక్లర్ల(బిందుసేద్యానికి వాడేవి)ను తీసుకొచ్చాడు. వాటిని బంకుపై భాగంలో ఏర్పాటు చేసి, నీటి తుంపర్లు చిరుజల్లులా కిందికి పడేట్లు చేసి, ఆవరణంతా చల్లగా ఉండేలా చూస్తున్నాడు. పొగమంచులా నీటిబిందువులు పడుతూ వాతావరణాన్ని చల్లబరుస్తుండటంతో- సిబ్బందీ, పెట్రోలు కొట్టించుకునేవారూ, ఆ దారిన వెళ్లేవారూ అక్కడ హాయిగా సేదతీరుతున్నారు. బంకు యజమాని  పదికాలాలపాటు చల్లగా ఉండాలనీ కోరుకుంటున్నారు.