హాయిగా చదువుకోవచ్చు!

లైబ్రరీల్లో పుస్తకాలూ, బల్లలూ, కుర్చీలూ ఉంటాయి. నాలుగ్గోడల మధ్యన విద్యుత్‌ వెలుగుల్లో ఆ వాతావరణం ఎంతో గంభీరంగా ఉంటుంది. దక్షిణకొరియా రాజధాని సియోల్‌లో ఉన్న మెట్రో లైబ్రరీ చదువుకోవడానికే కాదు ఆహ్లాదంగా గడపడానికి కూడా ఎంతో బాగుంటుంది. అందుకే ఆ లైబ్రరీ ఈ మధ్య అంతర్జాతీయ గ్రంథాలయాల సమాఖ్య నుంచి గ్రీన్‌ అవార్డును అందుకుంది. ఆరుబయట చుట్టూ చెట్లూ- వాటి మధ్య పచ్చిక బయళ్లలో ఏర్పాటు కావడమే ఆ గ్రంథాలయం ప్రత్యేకత. దాదాపు ఐదువేల పుస్తకాలున్న ఆ లైబ్రరీలో రంగురంగుల బీన్‌ బ్యాగులుంటాయి. వాటిపైన ఎక్కడంటే అక్కడ కూర్చుని లేదంటే పడుకుని పుస్తకాలు చదువుకోవచ్చు. ప్రకృతిని ఆస్వాదిస్తూ పుస్తకాలు చదువుకునే వీలున్న ఆ లైబ్రరీ- దాదాపు 150 దేశాల్లోని సుమారు పదిహేను వందల ‘లైబ్రరీస్‌ ఫెడరేషన్ల’ మెప్పు పొంది గ్రీన్‌ అవార్డును సొంతం చేసుకుంది.