Sam Altman: సీఈఓ కోసం... ఉద్యోగులందరి రాజీనామా!

బిల్‌ గేట్స్‌ - మైక్రోసాఫ్ట్‌ అధినేత. స్టీవ్‌ జాబ్స్‌- ఆపిల్‌ సృష్టికర్త. మార్క్‌ జుకర్‌బర్గ్‌- ఫేస్‌బుక్‌ రూపకర్త... వీళ్ల సరసన నిల్చోదగ్గవాడు శామ్‌ ఆల్ట్‌మాన్‌(Sam Altman)! అడిగిన కొన్ని క్షణాల్లోనే అచ్చం మనుషులంత తెలివిగా జవాబు చెప్పగల, వ్యాసాలూ పాటలూ రాయగల ‘చాట్‌-జీపీటీ’ని రూపొందించినవాడు. అలాంటివాటికోసమే ‘ఓపెన్‌ ఏఐ’ అన్న సంస్థని నెలకొల్పాడు. సంస్థ నుంచి ఇటీవల శామ్‌ ఆల్ట్‌మన్‌ని తొలగిస్తే ‘అతను వెళ్ళిపోతే మేమూ రాజీనామా చేస్తాం’ అని బోర్డుసభ్యుల్ని ఉద్యోగులు హెచ్చరించడం టెక్‌ ప్రపంచంలో ఓ సంచలనం.! దాని నేపథ్యం ఇది...

శామ్‌ ఆల్ట్‌మాన్‌ అమెరికాలోని షికాగోలో పుట్టాడు, ముస్సోరి రాష్ట్రంలోని సెయింట్‌ లూయీ నగరంలో పెరిగాడు. తల్లి డాక్టర్‌... చర్మవ్యాధి నిపుణురాలు. తండ్రి ఓ చిన్నసైజు స్థిరాస్తి దళారి. మామూలు మధ్యతరగతి జీవితమే వాళ్ళది. శామ్‌ చిన్నప్పటి నుంచీ లెక్కల్లో గట్టివాడు. అది గమనించి వాళ్లమ్మ- ఎనిమిదో తరగతప్పుడు ఓ కంప్యూటర్‌ని కొనిచ్చిందట. అందులో కంప్యూటర్‌ ప్రోగ్రామ్స్‌ రాయడం నేర్చుకోవడమే... అతని పంథాని మార్చేసింది. ప్రపంచమంతా సీటుకోసం కలలుకనే స్టాన్‌ఫర్డ్‌ వర్సిటీలో కంప్యూటర్‌ సైన్స్‌ విద్యార్థిని చేసింది. కానీ- కొంతకాలం తర్వాత ఆ క్లాసులేవీ రుచించలేదు. తన గదిలోనే ఉంటూ ‘లూప్ట్‌’ అన్న సరికొత్త సామాజిక మాధ్యమాన్ని సృష్టించాడు. అందులో పెట్టుబడులు పెట్టడానికి ‘వై- కాంబినేటర్‌’ సంస్థ ముందుకొచ్చింది. అలా ముందుకొచ్చిన- ఆ సంస్థ నిర్వాహకులకి ఈ కుర్రాడి తెలివితేటలూ సామర్థ్యమూ నచ్చి సంస్థలో భాగస్వామిగా చేర్చుకున్నారు. శామ్‌తో ఆ సంస్థ దశ తిరిగిపోయింది...

మీషో, జెప్టో అలా వచ్చినవే...

అప్పటిదాకా అమెరికాలోని ఏవో చిన్న స్టార్టప్‌లకి ఆర్థికసాయం చేస్తూ వచ్చిన వై-కాంబినేటర్‌ పరిధిని ప్రపంచవ్యాప్తం చేశాడు శామ్‌. 2014లో... తన 23 ఏళ్ళ వయసులో దానికి అధ్యక్షుడయ్యాడు. కేవలం డబ్బే కాదు- స్టార్టప్‌ వ్యవస్థాపకులకి కావాల్సిన శిక్షణ కూడా అందించడం మొదలుపెట్టాడు. మనదేశానికి చెందిన రేజర్‌ పే, మీషో, జెప్టో వంటి వందలాది సంస్థలు ఆ రకంగా వచ్చినవే. అలా 10 వేల అంకురాలకి సాయం చేశాడతను! అప్పుడే అతని దృష్టి కృత్రిమ మేధపైన పడింది...

అణుబాంబే కానీ...

‘కృత్రిమ మేధ ఓ అణుబాంబులాంటిది. అది దుష్టశక్తుల చేతుల్లోకి వెళితే వినాశనమే. అలాకాకుండా- దాని ఆవిష్కరణలకి మనమే సారథ్యం వహిద్దాం. ఆ నైపుణ్యాలు ప్రజలందరికీ చేరువచేద్దాం..’ - ఈ లక్ష్యంతోనే ‘ఓపెన్‌ ఏఐ’ సంస్థని ఏర్పాటుచేయాలనుకున్నాడు శామ్‌ ఆల్ట్‌మన్‌. టెస్లా వ్యవస్థాపకుడు ఎలాన్‌మస్క్‌ వంటి 12 మంది సాంకేతిక మేధావులూ అతనితో చేతులు కలిపారు. సంస్థ లక్ష్యం గొప్పదైనా- ‘ఏఐ’ని సృష్టించేందుకు కావాల్సిన అతిశక్తిమంతమైన కంప్యూటర్‌లు లేక మొదట్లో ఇబ్బంది పడాల్సి వచ్చేది. సీపీయూలూ, జీపీయూలని కూడా గూగుల్‌ సంస్థ నుంచి అద్దెకు తెచ్చుకోవాల్సిన పరిస్థితి. అయితేనేం - మూడేళ్ళకల్లా ‘జనరేటివ్‌ ప్రీ-ట్రెయిన్డ్‌ ట్రాన్స్‌ఫార్మర్‌’(జీపీటీ) అన్న ఏఐ ఉపకరణాన్ని తీసుకురాగలిగాడు శామ్‌ ఆల్ట్‌మన్‌. నేటి ప్రపంచ సంచలనం చాట్‌-జీపీటీకి అలా నాందిపలికాడు! అయితే...

నిధుల్లేవు...

2019లో ఈ సంస్థలో భాగంగా ఉన్న ఎలాన్‌ మస్క్‌ తప్పుకున్నాడు. అతనితోపాటూ అతనిచ్చే నిధులు ఆగిపోయాయి. ఓ దశలో ఆఫీస్‌ అద్దె, కరెంటు బిల్లులు చెల్లించడమే కష్టమైంది. ఆ నేపథ్యంలోనే ‘ఓపెన్‌ ఏఐ’ స్వచ్ఛంద సంస్థకి అనుబంధంగా పూర్తి వాణిజ్య అవసరాలకని ‘ఓపెన్‌ ఏఐ గ్లోబల్‌’ అన్న సంస్థని తెచ్చాడు. అందులోకి పెట్టుబడులని ఆహ్వానిస్తే- మైక్రోసాఫ్ట్‌ సీఈఓ సత్యనాదెళ్ళ స్పందించి... లక్ష కోట్ల రూపాయలు పెట్టుబడి పెట్టాడు. ఎంతగా పెట్టుబడుల్ని ఆహ్వానిస్తేనేం, అందులో చాలా నియమాలు పెట్టాడు శామ్‌. పెట్టుబడిదారులు అందించిన నిధులపైన కేవలం వందరెట్లు లాభం మాత్రమే వాళ్ళకివ్వాలన్నది అందులో ఒకటి. ఆ పైన వచ్చిన లాభాలన్నీ- ‘ఓపెన్‌ ఏఐ’ స్వచ్ఛంద సంస్థకీ, ఉద్యోగులకీ వాటాలకింద వెళతాయి. శామ్‌తోపాటున్న మరో ముగ్గురు వ్యవస్థాపకులు- తమకొచ్చే జీతం తప్ప వాటాలేవీ తీసుకోరు. ఏమైతేనేం- ఒకప్పుడు వందమందితో నడిచిన సంస్థ రెండేళ్ళకి 770 మందికి చేరింది. సీఈఓగా ప్రతి ఒక్కరి నుంచీ ‘ది బెస్ట్‌’ నైపుణ్యాన్ని వెలికితీసే అతని తీరు- అందరూ అతణ్ణి ఆరాధించేలా చేసింది. ఆ సామర్థ్యమే ఒకప్పుడు అద్దె కట్టడానికే డబ్బుల్లేని ‘ఓపెన్‌ ఏఐ’ సంస్థని 7.5 లక్షల కోట్ల విలువున్న సంస్థగా నిలబెట్టింది. కానీ- ఉద్యోగులు అంతగా ఆరాధిస్తున్నా... సంస్థ బోర్డుమెంబర్స్‌లో అతనిపట్ల వ్యతిరేకత మొదలైంది. పెట్టుబడులూ, కొత్త ఉత్పత్తుల వివరాలేవీ తమతో పంచుకోవట్లేదని విమర్శించసాగారు. అదే కారణం చూపిస్తూ నవంబర్‌ మూడోవారంలో అతణ్ణి కంపెనీ నుంచీ తొలగించేశారు. ఆ విషయం తెలియగానే కంపెనీలోని ఉద్యోగులందరూ అతనితోపాటూ తామూ వెళ్ళిపోతామని బోర్డుసభ్యులకి లేఖరాశారు. ఈ సంస్థలో పెట్టుబడులు పెట్టిన మైక్రోసాఫ్ట్‌ తదితర సంస్థలు శామ్‌కీ, ఉద్యోగులకీ మద్దతునిచ్చాయి! అందరి ఒత్తిడి ఫలితంగా చివరికి శామ్‌ని కంపెనీ నుంచి తొలగించిన బోర్డు సభ్యులే రాజీనామా చేసి వెళ్ళిపోయారు. శామ్‌, అతని ఉద్యోగులే కంపెనీలో మిగిలారు... టెక్‌ చరిత్రలో సంభవించిన ఓ అరుదైన ఘటనకి గుర్తులుగా!