పార్కిన్సన్స్‌నీ పసిగట్టేస్తున్నాయట!

అమెరికాలో ఆ మధ్య కొన్నిరకాల క్యాన్సర్‌లూ, కొవిడ్‌ వంటి వ్యాధుల్ని పసిగట్టేందుకు కుక్కల్ని వాడుతున్నారంటూ వార్తలొచ్చాయి కదా! తాజాగా ఆ కోవలోకి ‘పార్కిన్సన్స్‌ డిసీజ్‌’ కూడా వచ్చి చేరింది. శరీర నాడీవ్యవస్థని దెబ్బతీసే తీవ్ర సమస్య ఇది. ఈ వ్యాధి బయటపడటానికి ముందే చర్మం నుంచి స్రవించే ‘సీబమ్‌’ ద్రవాల్లో- దానికి సంబంధించిన వందరకాల రసాయనాలు ఉంటాయని ఇదివరకే శాస్త్రవేత్తలు నిరూపించారు. కానీ- ఆ రసాయనాలని ల్యాబులో కచ్చితత్వంతో వేరుచేసే పద్ధతులేవీ ఇప్పటిదాకా రాలేదు. అందుకే- శాస్త్రవేత్తలు కుక్కల సాయం తీసుకుంటున్నారు. మనకంటే వాటి ఆఘ్రాణశక్తి లక్షరెట్లు ఎక్కువ కాబట్టి ఈమేరకు ప్రత్యేక తర్ఫీదునిస్తున్నారు. వాషింగ్టన్‌లోని ‘పాడ్స్‌ ఫర్‌ పార్కిన్సన్స్‌’ అనే సంస్థ ఇందుకోసం 23 జాతులకి చెందిన 16 పెంపుడు కుక్కల్ని ఎంపికచేసింది. వాటికి- ఫ్రాన్స్‌లో ఎనిమిది నెలలపాటు శిక్షణ అందించింది. శిక్షణ తర్వాత ఆ శునకాలకి పార్కిన్సన్స్‌ వ్యాధిగ్రస్తులూ, ఆ సమస్యలేనివాళ్ళూ వాడిన దుస్తుల్ని అందిస్తే- 86 శాతం కచ్చితంగా అవి రోగుల్ని గుర్తుపట్టేశాయట. మరో నాలుగునెలల శిక్షణతో ఇవి వ్యాధి ప్రారంభదశనీ పసిగట్టేస్తాయని ఆశాభావం వ్యక్తంచేస్తున్నారు శిక్షకులు!