ఆలూచిప్స్‌... ఇక నిశ్చింతగా తినొచ్చు!

చేగోడీలు, మురుకులు, వడియాలు... ఇలా నూనెలో వేయించిన చిరుతిళ్ళ ఆహారం మార్కెట్టు విలువ మనదేశంలో ఏటా కొన్ని వేల కోట్ల రూపాయలట! వాటిల్లో 85 శాతం వాటా ఆలూచిప్స్‌దేనంటారు. కానీ, ఈ చిప్స్‌లో- చాలా తక్కువ మోతాదులో అక్రిలామైడ్‌ అనే క్యాన్సర్‌ కారక రసాయనం ఉంటోందని ఇప్పటికే పలు పరిశోధనలు హెచ్చరించాయి. ఈ హానికారక రసాయనం ఉత్పత్తి కావడానికి ప్రధాన కారణం- బంగాళాదుంపల్ని ఎక్కువకాలం శీతల గిడ్డంగుల్లో ఉంచడమేనంటారు.  అలా ఉంచినప్పుడు- బంగాళాదుంపల్లోని పిండిపదార్థం(స్టార్చ్‌) కాస్తా చక్కెరలుగా మారుతుంది. ఈ ప్రక్రియని కోల్డ్‌ ఇండ్యూస్డ్‌ స్వీటెనింగ్‌(సీఐఎస్‌) అంటారు. ‘సీఐఎస్‌’కి లోనైన ఆలూని నూనెలో వేయించడం వల్లే హానికారక ‘అక్రిలామైడ్‌’ ఉత్పత్తవుతుంది. ఈ సమస్యకి ఓ పరిష్కారం కనిపెట్టారు అమెరికాలోని మిషిగన్‌ స్టేట్‌ యూనివర్సిటీ ప్రొఫెసర్లు- జిమింగ్‌ జియాంగ్‌, డేవిడ్‌ డూషస్‌. వీళ్ళు ఇటీవల బంగాళాదుంపల్లో అలా ‘సీఐఎస్‌’కి కారణమయ్యే జన్యువునీ, దాని నియంత్రణ వ్యవస్థనీ పసిగట్టారు. ఆ జన్యువుని నిర్వీర్యం చేసే పద్దతినీ ఆవిష్కరించేశారు. దాంతో ఇకపైన బంగాళాదుంపలు ఎన్నిరోజులు శీతలగిడ్డంగుల్లో ఉన్నా సరే క్యాన్సర్‌ కారక రసాయనాలు ఉండబోవని... హామీ ఇస్తున్నారు!