బట్టతల మందుతో... హృద్రోగ చికిత్స?!

మగవారిలో ఓ వయసు దాటాక బట్టతల వస్తుంది, దాంతోపాటూ ప్రొస్టేట్‌ గ్రంథి కూడా వాస్తుంది. ఈ రెండు సమస్యలకీ ఒకే ఔషధంగా 1990ల నుంచీ ‘ఫినాస్టరైడ్‌’ అనే మందుని ప్రపంచవ్యాప్తంగా వాడుతున్నారు. దాని మంచిచెడులపైన అమెరికాలోని ఇలినాయి విశ్వవిద్యాలయం 2009- 2016 మధ్య ఓ అధ్యయనం నిర్వహించింది. అందులో పాల్గొన్నవారి వైద్య వివరాలని విశ్లేషిస్తే- ఫినాస్టరైడ్‌ మందుని వాడినవాళ్ళలో రక్తంలోని కొవ్వుశాతం తగ్గడం గమనించారట. ‘ఇదేదో బావుందే’ అనుకుని ఆ మందుపైన ఇటీవల మరిన్ని పరిశోధనలు చేశారు అదే వర్సిటీకి చెందిన ప్రొఫెసర్‌ జావుమా అమింగ్వల్‌. ఆ మందుని రకరకాల డోసులతో ఎలుకలకి ఇచ్చారు. మందుతోపాటూ అత్యధిక కొవ్వులతో కూడిన ఆహారాన్ని కూడా వాటికి పెట్టారు. నెల తర్వాత పరిశీలిస్తే ఎంత ఎక్కువ కొవ్వుల్ని తిన్నాసరే- ఎలుకల రక్తంలోనూ, గుండెకి రక్తం సరఫరా చేసే ధమనుల్లోనూ కొవ్వు చేరలేదని తేలిందట. అంతేకాదు, కాలేయ వాపు సూచీలు(లిపిడ్‌ మార్కర్స్‌) కూడా పెరగలేదట. దానిక్కారణం ఈ మందేనని నిర్ధారించారు. మనుషుల్లోనూ ఇది సత్ఫలితం చూపొచ్చని ఆశాభావం వ్యక్తంచేస్తున్నారు.