Biryani - Rice: ఇది బిర్యానీయే... కానీ వేరు!

బిర్యానీ అంటే బియ్యం వేరుగా, మాంసం వేరుగా ఉంటుంది. మరి ఆ బియ్యం గింజలోనే మాంసం భాగమైతే ఎలా ఉంటుంది? దక్షిణ కొరియా సియోల్‌లోని యోన్సే వర్సిటీ శాస్త్రవేత్తలు అలాంటి విచిత్ర ప్రయోగం ఒకటి చేశారు. వరి కంకి ఎదిగేటప్పుడే వడ్లకి మాంసం కణాలని అతికించి వాటిని పెరగనిచ్చారు. వారంపాటు కంకిలో అవి ఎదిగాక- ల్యాబుల్లో పెట్టి మరో వారం పెంచారు. అలా ఎదిగిన వడ్లని పొట్టుతీసి చూస్తే... ఏముంది! మాంసం కలిసిన సరికొత్త ‘హైబ్రిడ్‌’ బియ్యం సిద్ధమై పోయింది.

ఈ మధ్య ల్యాబుల్లో మాంసాన్ని ఉత్పత్తి చేయడం గురించి వినే ఉంటారు. దానికి ఖర్చు చాలా ఎక్కువగా ఉంటోందట. ఆ వ్యయం తగ్గించాలనే మాంసం కణాలని ఇలా వడ్లతో కలిపి పెంచే సరికొత్త ప్రయోగానికి తెరతీశారు శాస్త్రవేత్తలు. గులాబీ రంగులో మన ఊరి దొడ్డుబియ్యంలా ఉండే ఈ హైబ్రిడ్‌ రకాన్ని వండి చూసి... రుచి అమోఘమంటున్నారు కొరియన్‌ శాస్త్రవేత్తలు. మామూలు బియ్యాని కన్నా ఇందులో ప్రొటీన్‌ ఏడుశాతం ఎక్కువగా ఉందనీ వివరిస్తున్నారు!