ఆల్జీమర్స్‌కి అనుకున్న చికిత్స ఇలా...

ఓ సమస్య నివారణకని అనుకున్న చికిత్స అనూహ్యంగా మరొకదానికి ఉపయోగ పడటం వైద్య ప్రపంచంలో అప్పుడప్పుడూ జరుగుతూ ఉంటుంది. ఇది అలాంటిదే. అమెరికాలోని ‘ఎంఐటీ’లో ఆ మధ్య ఆల్జీమర్స్‌కని ఓ సరికొత్త చికిత్సని రూపొందించారు. ‘సౌండ్‌ అండ్‌ లైట్‌’ థెరపీ అంటున్నారు దీన్ని. ఇందులో భాగంగా ఆల్జీమర్స్‌ ఉన్నవాళ్ళకి ప్రత్యేక కళ్ళద్దాల్లాంటి పరికరాన్నిస్తారు. ఆ అద్దాల్లోని లైటు వెలుగుతూ ఆరిపోతూ ఉంటుంది. దాంతోపాటూ అందులో ఆగి-ఆగి వినిపించే ఓ శబ్దం కూడా వస్తుంది. ఆ వెలుగు క్షణానికి 40 సార్లు మిణుమిణుకుమంటే, శబ్దం కూడా అదే రీతిలో ఆగిపోయి మళ్ళీ వస్తూ ఉంటుంది. క్షణానికి నలభైసార్లన్న ఈ లెక్కని ‘40 హెర్జస్‌’ అంటారు. ఆల్జీమర్స్‌ ఉన్నవాళ్ళు ఓ గంటపాటు ఆ ‘40 హెర్జస్‌’ వెలుగుని చూసి, శబ్దాన్ని వింటే మెదడులో జ్ఞాపకశక్తికి కారణమైన ‘గామా’ తరంగాలు ప్రేరణకి గురవుతాయట. అలా ఆల్జీమర్స్‌ని నివారించొచ్చని శాస్త్రవేత్తలు చెబుతూ వచ్చారు. తాజాగా- ఈ ‘లైట్‌ అండ్‌ సౌండ్‌’ చికిత్స- కీమో థెరపీతో మెదడు పనితీరు బలహీనమైన వాళ్ళలోనూ పనిచేస్తున్నట్టు పసిగట్టారు. ఈ మేరకు ఎలుకల్లో ప్రయోగాలు చేసి విజయం సాధించారు. త్వరలోనే- క్లినికల్‌ ట్రయల్స్‌కీ వెళ్ళబోతున్నారట!