ఉమ్మనీటితో... అవయవాలు చేసేస్తారట!

గర్భిణుల్లోని ఉమ్మనీటితో ల్యాబుల్లోనే వివిధ అవయవాలకి చెందిన కణజాలాన్ని(టిష్యూ) తయారుచేసే కొత్త విధానాన్ని లండన్‌ శాస్త్రవేత్తలు ఆవిష్కరించారు. ఈ విధానంతో ఊపిరితిత్తులు, కిడ్నీలు, చిన్న పేగుల కణజాలాన్ని సృష్టించగలుగుతున్నారు. లండన్‌లోని గ్రేట్‌ ఆర్మండ్‌ స్ట్రీట్‌ హాస్పిటల్‌కి చెందిన పాలో డి కాపి అనే శాస్త్రవేత్త ఈ కణజాలాన్ని త్రీడీలో రూపొందించారు. దీన్ని ‘ఆర్గనాయిడ్‌’ అని పిలుస్తున్నారు. ఈ ఆవిష్కరణతో భవిష్యత్తులో ఉమ్మనీటితో పూర్తిస్థాయిలో కిడ్నీలు, ఊపిరి తిత్తుల్లాంటివాటిని రూపొందించే అవకాశం ఉంది. వాటి ద్వారా గర్భస్థ శిశువులకి కూడా కిడ్నీ, ఊపిరితిత్తుల మార్పిడి ఆపరేషన్‌లు చేసేయొచ్చు. భవిష్యత్తు సరే- నేటి ఉపయోగమేంటీ అంటారా? కొందరు శిశువులకి గర్భంలోనే ‘కంజెనిటల్‌ డయాఫ్రమెటిక్‌ హెర్నియా’(సీడీహెచ్‌) సమస్య ఏర్పడుతుంది. వీరిలో ఎడమ ఊపిరితిత్తి చిన్నగా ఉంటుంది. ఈ సమస్యని పిండ దశలోనే వైద్యులు గుర్తిస్తున్నారు కానీ- ‘ఆ సమస్య తీవ్రత ఎంత?’ అన్నదానిపైన స్పష్టత తెచ్చుకోలేకపోతున్నారు. అదే, ఉమ్మనీటితో తయారుచేసిన ఊపిరితిత్తుల ఆర్గనాయిడ్‌తో వ్యాధి తీవ్రతని ఇట్టే చెప్పేయొచ్చట! ఇప్పటికే లండన్‌లో అలాంటి వ్యాధి నిర్ధారణ పరీక్షలనీ మొదలుపెట్టేశారు.