స్ట్రోక్‌ మందు... ఇక ల్యాబుల్లోనే!

హెపారిన్‌... శరీరంలో రక్తం గడ్డకట్టకుండా అడ్డుకునే మందు. పక్షవాతం వచ్చినప్పుడో, బైపాస్‌లాంటి సర్జరీలు చేస్తున్నప్పుడో ప్రపంచ వ్యాప్తంగా వైద్యులు దీన్నే వాడుతుంటారు. రోజురోజుకీ దీని వాడకం పెరగడం వల్ల- ఉత్పత్తి కూడా పెరగాల్సిన అవసరం ఉంటోంది. కాకపోతే, ఆ డిమాండు మేరకు ప్రపంచంలో పందుల సంఖ్య లేదు. మామూలుగా జంతువుల నుంచి తీసే ఏ మందు విషయంలోనైనా- సంబంధిత జంతువుల్ని ప్రత్యేకంగా ల్యాబుల్లోనే పెంచాలి. హెపారిన్‌ కొరత కారణంగా మామూలు ఫారమ్‌లో ఉన్న పందుల్నీ ఇందుకోసం తీసుకోవచ్చని ప్రభుత్వాలు అనుమతులిస్తున్నాయి. కానీ- ఆ పందులతో చేసిన మందుల వల్ల ఇన్ఫెక్షన్స్‌ పెరుగుతున్నాయి. దాంతో దీన్ని ల్యాబుల్లోనే తయారుచేసేందుకు ప్రయోగాలు జరుగుతూ వస్తున్నాయి. తాజాగా అందులో విజయం సాధించారు పరిశోధకులు. ఇప్పటిదాకా ఈ మందుల్లో వాడే సహజ చక్కెర్ల గొలుసు అమరికను(షుగర్‌ చైన్స్‌) రూపొందించడం క్లిష్టంగా ఉండేదట. ఆ సమస్యని అమెరికాలోని ఉటా విశ్వవిద్యాలయం శాస్త్రవేత్తలు తాజాగా ఛేదించి విజయవంతంగా హెపారిన్‌ను తయారుచేయగలిగారు. పక్షవాతం, గుండెపోటు, సర్జరీల చికిత్సకి సంబంధించి ఇదో పెద్ద ముందడుగని చెబుతున్నారు. త్వరలోనే ఫార్మాకంపెనీలు వీటిని ఉపయోగంలోకి తీసుకురాబోతున్నాయట!