ఆ గుడ్డు తినొచ్చు!

శాకాహారులైనా మాంసాహారులైనా సరే- గుడ్లు తినడంపైనా ఎన్నో భయాలు అలముకుంటున్నాయిప్పుడు. ముఖ్యంగా- గుడ్డులో కొవ్వుశాతం ఎక్కువగా ఉంటుందనీ, అది హృద్రోగాలకి దారితీస్తుందనీ చాలామంది నమ్ముతారు. ఇందులోని నిజాలేమిటో తేల్చుకోవాలని తాజాగా ఓ చిన్నపాటి పరిశోధన నిర్వహించారు అమెరికాలో. అక్కడి డ్యూక్‌ రీసెర్చ్‌ ఇన్‌స్టిట్యూట్‌ శాస్త్రవేత్తలు ఇందుకోసం అరవైయేళ్ళు దాటిన 140 మందిని ఎంచుకున్నారు. వీళ్ళలో సగంమందిని విటమిన్లు ఎక్కువగా ఉన్న ‘ఫార్టిఫైడ్‌’ గుడ్లని తినమన్నారు. వారానికి 12 గుడ్లు- ఏరూపంలోనైనా తీసుకోవచ్చని చెప్పారు. మిగతావాళ్ళని ఐదుకన్నా తక్కువ గుడ్లు తినమన్నారు. నాలుగు నెలల తర్వాత వాళ్ళని పరీక్షిస్తే- గుడ్లు  ఎక్కువగా తిన్నవాళ్ళలో కొలెస్ట్రాల్‌ పెరగకపోగా -0.64 నుంచి -3.14 వరకూ తగ్గిందట. పైగా, గుడ్డులోని విటమిన్లు అందడం వల్ల మధుమేహానికి కారణమైన ‘ఇన్సులిన్‌ రెసిస్టెన్స్‌’ కూడా స్వల్పంగా తగ్గిపోయిందని చెబుతున్నారు! కాబట్టి, రోజుకో గుడ్డు తినడం మేలేనంటున్నారు.