ఆ బ్యాక్టీరియానే క్యాన్సర్‌కి కారణమా?

పెద్దపేగు క్యాన్సర్‌... ఒకప్పుడు 50లు దాటినవాళ్ళలోనే ఎక్కువగా కనిపించేది. పాశ్చాత్యదేశాల్లో ఇప్పుడది యువతనీ కబళిస్తోంది. దానికి కారణాలూ, నివారణలూ వెతికే క్రమంలో తాజాగా ఓ కొత్త లంకెని పట్టుకున్నారు చైనా శాస్త్రవేత్తలు. ఈ క్యాన్సర్‌కి గురైన యువత జీర్ణాశయంలో కామన్‌గా కొన్ని బ్యాక్టీరియా కనిపిస్తున్నాయని పసిగట్టారు. సాధారణంగా- జీర్ణాశయంలోని సూక్ష్మజీవుల్లో (గట్‌ మైక్రోబియం) అన్నీ మంచి చేసేవే ఉంటాయన్న అపోహ ప్రజల్లో ఉంది. కానీ- అవన్నీ మనకు మంచే చేయవని చెబుతున్నారు ఈ పరిశోధకులు. ముఖ్యంగా- ఫ్యుసో బ్యాక్టీరియం, క్లాస్ట్రిడియం, షెవానిల్లా రకం సూక్ష్మజీవులు పెద్దపేగు క్యాన్సర్‌ ఉన్న యువతలో ఎక్కువగా ఉన్నాయని తేల్చారు. ఈ బ్యాక్టీరియాకీ- యువత తీసుకునే ఆహారానికీ సంబంధం ఉందనీ ఈ శాస్త్రవేత్తలు చెబుతున్నారు. పాలిష్‌ చేసిన ధాన్యాలూ, ప్రాసెస్‌ చేసిన మాంసపదార్థాలూ, చక్కెరతో కూడిన చిరుతిళ్ళూ ఎక్కువగా తినేవాళ్ళలో ఈ బ్యాక్టీరియా అధికంగా ఉన్నాయట. కాబట్టి- ఇప్పటికే పెద్దపేగు క్యాన్సర్‌కి గురైనవాళ్ళు పీచు ఎక్కువగా ఉన్న ధాన్యాలూ, పండ్లూ తీసుకుంటే చెడుచేసే బ్యాక్టీరియా తగ్గొచ్చని చెబుతున్నారు.