గుండెకీ... పంటికీ ముడి!

దంతాల సమస్యకీ హృద్రోగానికీ దగ్గర సంబంధం ఉందని చెప్పేందుకు మరో బలమైన సాక్ష్యాన్ని ప్రపంచం ముందు పెట్టారు జపాన్‌ శాస్త్రవేత్తలు. చిగురు వాపో- పూతో కారణం ఏదైనా సరే అక్కడ ఏర్పడే బ్యాక్టీరియా నేరుగా గుండెనాళాల్లోకి ప్రవేశించి హృద్రోగానికి దారితీస్తోందట. ఈ మధ్య జపాన్‌ శాస్త్రవేత్తలు గుండె అవసరానికన్నా వేగంగా కొట్టుకునే- అట్రియల్‌ ఫైబ్రిలేషన్‌ సమస్య ఉన్న 288 మంది రోగుల్ని పరిశోధనకి తీసుకున్నారు. వీళ్ళందరికీ చిగురువాపు సమస్య కూడా ఉంది. ఈ 288 మందీ తమ హృద్రోగానికి సర్జరీ చేయించుకున్నారు. అలా చేయించుకున్న 91 మంది మూణ్ణెళ్ళ తర్వాత తమ చిగురువాపు సమస్యకీ చికిత్స తీసుకున్నారు. వీళ్ళందరినీ రెండేళ్ళ తర్వాత మళ్ళీ పరిశీలించారు జపాన్‌లోని హిరోషిమా వర్సిటీకి చెందిన ఈ శాస్త్రవేత్తలు. ఆ రోగుల్లో 24 శాతం మందికి హృద్రోగ సమస్య తిరగబెట్టిందట. వాళ్ళలో 90 శాతం మంది తీవ్ర చిగురువాపు సమస్య ఉన్నాసరే దాన్ని నిర్లక్ష్యం చేసినవాళ్ళట. అదే చిగురువాపు సమస్యకి చికిత్స తీసుకున్నవారిలో 60 శాతం మంది హృద్రోగాన్ని పూర్తిగా జయించారట. ఈ ఫలితాలని బట్టి... చిగురువాపు సమస్యకీ హృద్రోగాలకీ ఉన్న సంబంధం మరోసారి రుజువైందంటున్నారు శాస్త్రవేత్తలు. రోజూ రెండుసార్లు దంతధావనం చేయడం లాంటి చిన్నచిన్న జాగ్రత్తలతోనే పెద్ద సమస్యల్ని అధిగమించవచ్చని చెబుతున్నారు.