మెదడులోనూ మైక్రోప్లాస్టిక్కే!

‘ఇందుగలడందులేడని సందేహము వలదు...’ అన్న మాట మైక్రోప్లాస్టిక్కుకి బాగా వర్తిస్తుందిప్పుడు. నిన్నమొన్నటిదాకా మహాసముద్రాల్లోనే ఇవి ఉండేవని భావించేవారు. ఇప్పుడు మనం రోజూ కొని తాగే సీసా నీళ్ళలోనూ కనిపిస్తున్నాయట.  ఓ అంచనా ప్రకారం- మనం వారంలో సగటున ఐదు గ్రాముల మైక్రోప్లాస్టిక్‌ అణువుల్ని తింటున్నామట. అంటే, మనకు తెలియకుండానే ఓ ఏటీఎం కార్డంత ప్లాస్టిక్‌ని మింగేస్తున్నామన్నమాట! ‘మరి అలా లోపలికి వెళుతున్న ప్లాస్టిక్‌ కేవలం జీర్ణాశయంలోనే ఉండిపోతోందా? ఇతర అవయవాలకూ పాకుతోందా?’ అన్న ప్రశ్నతో తాజాగా పరిశోధనకి నడుం బిగించారు అమెరికాలోని న్యూమెక్సికో విశ్వవిద్యాలయం శాస్త్రవేత్తలు. ఇందులో భాగంగా- ఎలుకలకి రోజూ మైక్రోప్లాస్టిక్స్‌ ఉన్న నీటిని తాగించారు. నాలుగువారాల తర్వాత వాటిని పరిశీలిస్తే- జీర్ణాశయంలోకి వెళ్ళిన మైక్రోప్లాస్టిక్స్‌ అణువులు ఆ తర్వాత కాలేయం, కిడ్నీలతోపాటూ మెదడులోకీ వెళ్ళడం గమనించారు. ఇలా వెళ్లడం వల్ల చాలా నష్టాలే ఉంటాయని చెబుతున్నారు శాస్త్రవేత్తలు. శరీరంలో చేరే ఈ మైక్రోప్లాస్టిక్‌ అణువులు రోగనిరోధక శక్తిలో అతికీలకమైన ‘మైక్రోఫేగస్‌’ వ్యవస్థ పైన ప్రభావం చూపుతాయట. దాంతో- శరీరంలో దీర్ఘకాలిక వాపులూ నొప్పులూ మునుపుటికంటే పెరుగుతున్నాయంటున్నారు శాస్త్రవేత్తలు!