ఆ ఇన్ఫెక్షన్‌కో విరుగుడు!

మూత్రనాళం ఇన్ఫెక్షన్‌(యూరినరీ ట్రాక్ట్‌ ఇన్ఫెక్షన్‌- యూటీఐ)... స్త్రీలని వేధించే సమస్యల్లో ఒకటి. మగవాళ్ళతో పోలిస్తే మహిళలు 30 రెట్లు ఎక్కువగా ఈ సమస్య బారినపడతారట. వారిలో 20 శాతం మంది మళ్ళీ మళ్ళీ ఈ సమస్యకి లోనవుతున్నారట. ఈ మొండి సమస్యకే ఓ సులువైన వ్యాక్సిన్‌ని తీసుకొచ్చారు ఇంగ్లండులోని రాయల్‌ బర్క్‌షైర్‌ ఆసుపత్రి పరిశోధకులు. ‘యూరోమ్యూన్‌’ అనే ఈ టీకా మందుని నాలుక కింద భాగంలో స్ప్రే చేసుకోవాలి. అక్కడి నుంచి మన శరీరంలోని ఇతర ‘మ్యూకోజా’ భాగాల్లోకి ప్రవేశించే ఈ ఔషధం యూటీఐకి కారణమయ్యే 88 బ్యాక్టీరియాలపైన పోరాడుతుందట. టీకాలని సాధారణంగా నిర్వీర్యమైన బ్యాక్టీరియాతో చేస్తుంటారు. కానీ ఇది అలాకాదు. ఇందులోని ఔషధం శరీరంలోని బ్యాక్టీరియాని చంపదు... వాటిని స్థాణువుల్లా ఎటూ కదలకుండా చేస్తుంది. వాటి ప్రొటీన్‌ను అలాగే ఉంచుతుంది. శరీరంలోని రోగనిరోధకశక్తి ఆ ప్రొటీన్‌ని గుర్తించి - ఎటూ కదల్లేని బ్యాక్టీరియా అంతుచూస్తుంది. దీన్ని ప్రయోగాత్మకంగా వాడిన మగువల్లో తొమ్మిదేళ్ళపాటు సమస్య రాకుండా కాచుకుందట ఈ టీకా!