ఏ గ్రూపు రక్తమైనా... ఫర్వాలేదు!

ప్రపంచవ్యాప్తంగా ప్రస్తుతం ‘ఒ-నెగటివ్‌’ గ్రూపు రక్తాన్ని ఎవరికైనా ఇవ్వొచ్చని చెబుతారు. అందుకే, దాన్ని ‘యూనివర్సల్‌ డోనర్‌’ అనీ అంటారు. కాకపోతే, ఇది చాలా అరుదైన గ్రూపు. ప్రపంచంలో కేవలం ఏడుశాతం మందిలోనే ఈ తరహా రక్తం ఉంటుంది. ఈ నేపథ్యంలోనే, మామూలు ఎ, బి గ్రూపుల్ని కూడా ‘యూనివర్సల్‌ డోనర్‌’గా మారిస్తే ఎలా ఉంటుందన్న ఆలోచన వచ్చింది శాస్త్రవేత్తలకి. బ్లడ్‌ గ్రూపులకి కొన్ని అదనపు ఎంజైమ్‌లని చేర్చడం ద్వారా ఇది సాధ్యం కావొచ్చని- ఇప్పుడు కాదు- 40 ఏళ్ళకిందటే ఊహించారు. అప్పట్నుంచీ దానిపైన జరుగుతూ వచ్చిన పరిశోధనలు ఇప్పుడు ఓ కొలిక్కి వచ్చాయి. ‘బి’ గ్రూపుని ఇంచుమించు అలా ‘యూనివర్సల్‌ డోనర్‌’ రక్తంగా మార్చేశామని తాజాగా ప్రకటించారు డెన్మార్క్‌ టెక్నికల్‌ యూనివర్సిటీ శాస్త్రవేత్తలు. మన కడుపులో ఉండే ‘అకర్‌మాన్సియా ముసినిఫిలా’ అనే బ్యాక్టీరియా విడుదల చేసే ఎంజైమ్‌లని ఇంద]ుకోసం వాడుకున్నారట. ఈ ఎంజైమ్‌ బి గ్రూపులోని యాంటిజెన్‌ని ధ్వంసం చేస్తుందనీ, అలా ధ్వంసం చేయడం ద్వారా అది ఇతర ఏ గ్రూపు రక్తంతోనైనా కలిసిపోతుందనీ చెబుతున్నారు శాస్త్రవేత్తలు. ఆ రకంగా, బి గ్రూపు రక్తాన్ని ఇకపైన ఎవరికైనా ఇచ్చేలా దాదాపు మార్చామంటూ త్వరలో, ‘ఎ’ గ్రూపు రక్తాన్నీ ఇలా మార్చే పరిశోధన మొదలుపెడతామని చెబుతున్నారు.