కోపం ఎందుకు ప్రమాదమంటే...

గుండెపోటుకి ముఖ్యకారణాల్లో ఒకటి- రక్తనాళాలు సాగే గుణాన్ని కోల్పోవడం. అలా కోల్పోవడం వల్ల నాళాల్లో కొవ్వుపేరుకుపోయి రక్త ప్రసరణ కష్టమవుతుంది. ఈ పరిస్థితినే ‘అథెరోస్ల్కిరోసిస్‌’ అంటారు. ఈ పరిస్థితికి కోపం, ఆవేదన, ఆందోళనల వంటి ప్రతికూల భావాలు నేరుగా కారణమవుతాయా అన్న ప్రశ్నవేసుకుని పరిశోధనకు దిగారు ఈ మధ్య కొలంబియా వర్సిటీ శాస్త్రవేత్తలు. సుమారు 280 మంది యువతీయువకుల్ని - నాలుగు బృందాలుగా చేశారు. ఓ బృందాన్ని- ఇటీవల వాళ్ళకి బాగా కోపం తెప్పించిన సంఘటనని గుర్తుతెచ్చుకోమన్నారు. మరో బృందాన్ని- బాధ కలిగించిన అంశాన్నీ మూడో బృందాన్ని ఆందోళన కలిగించిన విషయాన్నీ తలచుకోమన్నారు. నాలుగోబృందాన్ని ఊరికే వంద నుంచి వెనక్కి లెక్కపెట్టమన్నారు. ఎనిమిది నిమిషాల తర్వాత వాళ్ళ రక్తనాళాల్ని పరీక్షించారు. తమ బాధ, ఆందోళనల్ని నెమరేసుకున్న బృందాల్లోనూ అంకెలు లెక్క పెట్టినవారిలోనూ పెద్దగా తేడాలేదట. అదే- కోపాన్ని గుర్తు తెచ్చుకుని ఆవేశానికి లోనైనవారిలో- రక్తనాళాల్లోని కణాలు క్షీణించడం స్పష్టంగా గమనించారట. వాటిల్లో సాగే గుణమూ దెబ్బతినడం చూశారట. కోపం ప్రభావం వారిపైన 40 నిమిషాలపాటు ఉండటం గమనించారట. కోపానికీ, గుండెపోటుకీ మధ్య ఉన్న ప్రత్యక్ష సంబంధంపైన ఈ పరిశోధన ఇదివరకులేని స్పష్టత ఇచ్చిందంటున్నారు శాస్త్రవేత్తలు.