‘ఇమ్యూన్‌’ దాడికి అదే కారణం!

లూపస్‌... మనకి మంచి చేయాల్సిన రోగనిరోధక వ్యవస్థ మనపైనే దాడిచేసే ‘ఆటో ఇమ్యూన్‌’ వ్యాధి. శరీరంపైన దద్దుర్లు రావడం నుంచి రుమటాయిడ్‌ ఆర్థ్రయిటిస్‌ దాకా చాలా సమస్యలు వస్తాయి దీనివల్ల. ఈ సమస్య బాధితుల్లో 90 శాతం మహిళలే ఉంటారు. అదీ భారతీయుల్లో దీని ప్రభావం మరీ ఎక్కువ. తాజాగా దీనికి మూలకారణమేంటో పసిగట్టారు ఫ్రాన్స్‌లోని పారిస్‌ సిటీ యూనివర్సిటీకి చెందిన పరిశోధకులు. మామూలుగా మగవారిలో ఎక్స్‌-వై క్రోమోజోములూ, మహిళల్లో ఎక్స్‌-ఎక్స్‌ క్రోమోజోములూ ఉంటాయని తెలుసు మనకు. కానీ- ఆడపిల్లలు రజస్వల కాగానే రెండు ‘ఎక్స్‌’ క్రోమోజోముల్లో ఒకటి బలహీనపడుతుంది. ఇలా బలహీనపడ్డ క్రోమోజోము కొందరు మహిళల్లో నడివయసు తర్వాత మళ్ళీ క్రియాశీలం అవుతోందట. అది అలా చురుకుదనాన్ని అందుకోవడం వల్ల- ‘టీఎల్‌ఆర్‌7’ అనే జన్యువు ప్రేరణకి గురై రోగనిరోధక వ్యవస్థని అవసరానికన్నా ఎక్కువగా స్పందించేలా చేస్తోందట. మహిళల్లో లూపస్‌ సమస్యకి ఇదే మూలమని ఈ పరిశోధన తేల్చింది. ఈ స్పష్టతతో రుమటాయిడ్‌ ఆర్థ్రయిటిస్‌ వంటి సమస్యలకి మేలైన చికిత్స సాధ్యం కావొచ్చంటున్నారు శాస్త్రవేత్తలు.